મોરબી – રાજકોટ હાઇવે પર સવારે સાતેક વાગ્યા આસપાસ કેટરિંગમાં જમવાનું પીરસવાની કામગીરી માટે મોરબીથી કુવાડવા તરફ છોટા હાથી યુવતીઓ અને મહિલાઓને લઇને જતી હતું. ત્યારે વિરપર નજીક અચાનક પલ્ટી મારી જતા કુલ 15 લોકોને નાની મોટી ઈજાઓ થતા મોરબી સારવાર માટે ખસેડવામાં આવ્યા હતા. રોડ ખાલી હોવા છતાં અચાનક કાવો મારતા છોટા હાથી વાહન પલ્ટી ગયું હતું અને અકસ્માત સર્જનાર છોટા હાથી વાહન ચાલકને ડ્રાઇવિંગ આવડતું ન હોવાનો આક્ષેપ ભોગ બનનાર બહેનોએ કર્યો હતો.
મળતી માહિતી અનુસાર, મોરબી – રાજકોટ હાઇવે ઉપર લજાઈ અને વિરપર ગામની વચ્ચે આજે સવારે સાતેક વાગ્યાના આસપાસ એક મેટાડોર છોટા હાથી વાહન પલ્ટી મારી દેતા તેમાં બેઠેલા 15 લોકોને ઈજા પહોંચતા સારવાર માટે 108 મારફતે સિવિલ હોસ્પિટલ ખસેડવામાં આવ્યા હતા. અકસ્માતનો ભોગ બનનાર કેટરિંગના ધંધાર્થીએ કહ્યું હતું કે, રાજકોટના કુવાડવા નજીક ખીજડિયા ગામે ધાર્મિક પ્રસંગમા ભોજન પીરસવા માટે તેઓ યુવતીઓ અને મહિલાઓને લઈ જતા હતા ત્યારે આ અકસ્માત બન્યો હતો. અને વધુમાં આ યુવાને જણાવ્યું હતું કે, રોડ એકદમ ખાલી હોવા છતાં છોટા હાથી વાહન ચાલકે નાગણીની જેમ ગાડી ચલાવી કાવો મારતા છોટા હાથી વાહન પલ્ટી મારી ગયું હતું. છોટા હાથી વાહનમાં બેઠેલા લોકોએ ચીસો પાડી બ્રેક મારવાનું કહ્યુ હોવા છતાં છોટા હાથી ચાલક વાહન કાબુ કરી ન કરી શકતા પલ્ટી મારી હતી અને ચાલકને ડ્રાઈવિંગ આવડતું ન હોવાનો પણ આક્ષેપ કરવામાં આવ્યો હતો. છોટા હાથી પલ્ટી મારી ગયાનાં અકસ્માતમાં એક બે યુવતીઓને ગંભીર ઇજાઓ પહોંચી છે.જ્યારે અન્ય લોકોને સામાન્ય ઇજા પહોંચી હોવાનું સામે આવ્યું છે.
