મોરબી સીરામિક મેન્યુફેકચર એસોસિએશનનું ઉદ્યોગ બચાવ માટેનું પગલું
મોરબી સિરામિક મેન્યુફેકચર એસોસિએશન દ્વારા જાહેર કરવામાં આવ્યું છે કે રો મટીરીયલ, ગેસ અને પેકેજિંગ ખર્ચમાં વધારો થવાના કારણે સિરામિક પ્રોડક્ટ્સના ભાવમાં આગામી ૧ ફેબ્રુઆરી ૨૦૨૫થી ૧૦% વધારો કરેલ છે. સીરામીક ઉદ્યોગની સ્થિતિ જાળવવા માટે આ ભાવ વધારાનો નિર્ણય લેવામાં આવ્યો છે.
મોરબી સિરામિક મેન્યુફેકચર એસોસિએશન દ્વારા ઓલ ઇન્ડિયા ટાઇલ્સ ડીલર અને એક્સપોર્ટરને પત્ર દ્વારા જાણ કરવામાં આવી છે કે છેલ્લા છ મહિનામાં સીરામિક ઉદ્યોગને ભારે પડકારોનો સામનો કરવો પડી રહ્યો છે. રો મટીરીયલ, ગેસ અને પેકેજિંગ ખર્ચમાં નોંધપાત્ર વધારો થવાને કારણે ઉદ્યોગને મોટું આર્થિક નુકશાન થયું છે. આ સ્થિતિમાં ઉદ્યોગની ક્વોલિટી જાળવવી અને સપ્લાય ચેન ટકાવી રાખવી મુશ્કેલ બની છે. સીરામીક ઉદ્યોગને આર્થિક રીતે ટકાવી રાખવા માટે ૧ ફેબ્રુઆરી ૨૦૨૫થી સિરામિક વોલ, ફ્લોર અને પાર્કિંગ પ્રોડક્ટ્સના ભાવમાં ૧૦% વધારો કરવાનું ફરજિયાત કરવામાં આવ્યું છે. વધુમાં એસોસીએશન દ્વારા સ્પષ્ટતા કરી છે કે જો આ ભાવ વધારાને સ્વીકારવામાં વિલંબ થશે તો સીરામીક ઉદ્યોગને ઉત્પાદન ઘટાડવું પડશે, જેનાથી સર્વાઇવ કરવું વધુ મુશ્કેલ બનશે તેમ પત્રમાં જણાવવામાં આવ્યું છે.
