મોરબી શહેરના રવાપર રોડ પર આવેલ લીલાલેર બગીચા નજીક બે શખ્સોએ વેપારીને લૂંટી લેવાના ઇરાદે હથિયાર બતાવી વેપારીને માર મારતા નાસભાગ મચી જવા પામી હતી. આ બનાવની જાણ થતાં પોલીસ ઘટના સ્થળે દોડી ગઈ હતી.
જાણવા મળતી વિગત અનુસાર મોરબી શહેરના રવાપર રોડ પર આવેલ લીલાલેર બગીચા પાસે ધોળા દિવસે વેપારીને
હથિયાર બતાવી લૂંટી લેવાનો પ્રયાસ કરાયો હોવાનો બનાવ સામે આવ્યો છે. વસંતભાઈ બાવરવા નામના વેપારી મોરબીના જુના બસસ્ટેન્ડ નજીક રૂપિયા આપવા જતા હતા તે દરમિયાન બે ઈસમોએ વેપારીને આંતરી લઈ વેપારીને હથિયાર બતાવી રોકડ રકમ લૂંટવાનો પ્રયાસ કરાયો હતો બંને શખ્સો વેપારીને માર મારતા હોવાનું સામે આવતા આજુબાજુના લોકો અને યુવાને દોડી ગયા હતા. આ તકે મહાવીર બારડ અને પિયુષ પટેલે મહા મહેનતે વસંતભાઈને બચાવી લઈ લૂંટારુ પાસેથી રૂપિયા છોડાવી લીધા હતા. આ દરમિયાન આરોપીઓ નાશી છૂટ્યા હતા. આ સમગ્ર ઘટના લોકોએ વિડીયોમાં કેદ કરી હતી. જે અંગે પોલીસને જાણ કરતાં પોલીસ સ્ટાફ ઘટના સ્થળે દોડી ગયો હતો અને તપાસનો ધમધમાટ શરૂ કર્યો છે. આરોપીઓ પોલીસની હાથવેતમાં હોવાનું જણાઈ રહ્યું છે.
બીજી તરફ આ ઘટનામાં ઇજાગ્રસ્ત વેપારીને સારવાર અર્થે તાત્કાલિક મોરબીની ખાનગી હોસ્પિટલ ખાતે ખસેડવામાં આવ્યા હોવાનું સામે આવ્યું છે.
