અસરગ્રસ્તો સહિત સમગ્ર શહેર મચ્છુ હોનારતના મૃતાત્માઓને શ્રદ્ધાંજલિ આપશે. હજારો લોકો અને પશુઓ સહિતમાં મોરબીમાં સર્વનાશ કરનાર પ્રલયકારી ઘટનાની યાદ તાજી થતા અસરગ્રસ્તોની આંખમાંથી વહેશે લાચારીના પુર
મોરબી : આજથી 43 વર્ષ પહેલાં મોરબી તબાહ થઈ ગયું હતું.ચારેકોર વિનાશ સાથે મોરબી સમશંભુમી બની ગયું હતું. મચ્છુના પૂરે મોરબીમાં એવો વિનાશ વેર્યો કે, મોરબી આખું સાફ થઈ ગયું હતું. મચ્છુ ડેમ તૂટતાની સાથે મચ્છુના રાક્ષસી કદના મોજા મોરબી ઉપર ત્રાટકતા હજારો લોકોને બચવાની પણ તક મળી ન હતી.મચ્છુના પૂરે એટલી હદે તબાહી મચાવી કે ચારેકોર જ્યાં જુઓ તો લોકો અને પશુઓના મૃતદેહ જ જોવા મળતા આખું શહેર સ્મશાન બની ગયું હતું. કાલે મચ્છુ હોનારતને 43 વર્ષ પુરા થશે ત્યારે અસરગ્રસ્તો સહિત સમગ્ર શહેર મચ્છુ હોનારતના મૃતાત્માઓને શ્રદ્ધાંજલિ આપશે. હજારો લોકો અને પશુઓ સહિતમાં મોરબીમાં સર્વનાશ કરનાર પ્રલયકારી ઘટનાની યાદ તાજી થતા અસરગ્રસ્તોની આંખમાંથી વહેશે લાચારીના પુર.
11 ઓગસ્ટ 1979 ના રોજ મોરબી નજીકનો મચ્છુ-૨ ડેમ તૂટતાની સાથે જ મોરબી હતું ન હતું થઈ ગયું હતું. મચ્છુના પુર આખા શહેરમાં ફરી વળતા અને પુલ પણ તૂટી જતા હજારો લોકો અને પશુઓ મોતને ભેટ્યા હતા. જો કે જળ હોનારતમાં મૃત્યુનો સાચો આંકડો આજે પણ બહાર આવ્યો નથી અને મચ્છુના પુરથી મોરબી ઉપરાંત આસપાસના ગ્રામ્ય વિસ્તારમાં જળ તાંડવઃ થતા હજારોની સંખ્યામાં લોકો મચ્છુના ધસમસતા પાણીમાં મોતની આગોશમાં હમેશ માટે સુઈ ગયા હતા. ઉપરાંત અન્ય હજારો અબોલ જીવના પણ પાણીમાં તણાઈ જવાથી મોત નીપજતા શેરી ગલ્લીઓ તો ઠીક વીજપોલ ઉપર, મકાનની છત ઉપર, વૃક્ષની ડાળીઓ ઉપર જ્યાં નજર કરો ત્યાં લટકતી લાશો જ જોવા મળતી હતી. મોરબીની બેઠું કરવા સરકાર અને દેશ વિદેશમાંથી સહાય-મદદ મળી હતી અને થોડા વર્ષોમાં જ મોરબી બેઠું થઈ ગયું છે. આજે મોરબી વિકાસની ઉંચાઈ ઉપર છે. પણ હોનરતની વરસીએ મોરબીવાસીઓ મૃતાત્માને શ્રદ્ધાજલી આપવાનું ચૂકતા નથી.
આથી મચ્છુ જળ હોનારતની કાલે વરસીએ કાલે મોરબી પાલિકા દ્વારા મૌન રેલીનું આયોજન કરેલ છે. કાલે 11 ઓગસ્ટે મચ્છુ જળ હોનારતની 43મી વરસી નિમિત્તે મોરબી નગરપાલિકા દ્વારા બપોરે 3-15 કલાકે નગરપાલિકા કચેરીથી મૌન રેલી કાઢવામાં આવશે અને મૃતાત્માઓના સ્મૃતિ સ્થંભ મણિ મંદિર ખાતે બપોરે 3-30 કલાકે પહોંચશે અને ત્યાં દિવંગત આત્માઓને શ્રદ્ધાંજલિ અર્પણ કરવામાં આવશે. જેમાં નગરપાલિકા દ્વારા તથા મહાનુભાવો દ્વારા પુષ્પાંજલિ અર્પણ કરી બે મિનિટનું મૌન પાળવામાં આવશે. જેમાં મોરબી નગરપાલિકાના અધિકારીઓ, પધાધિકારીઓ, કર્મચારીઓએ રાજકારણીઓ, શિક્ષણ, ઉધોગ સહિતના તમામ ક્ષેત્રેના લોકો પુષ્પાંજલિ અર્પણ કરી શ્રદ્ધાંજલિ આપશે. જો કે આ ઘટનાના સમયે 21 સાયરન વગાડવાના હોવાથી સાયરન વાગતા જ દરેક લોકો જે સ્થળે હશે ત્યાં ઉભા રહીને શ્રદ્ધાંજલિ આપશે.
