મોરબીમાં ચોરીનાં વધતા બનાવોને લઈ પોલીસ તંત્ર એલર્ટ થયું છે અને આવા ચોર-લૂંટારુઓને પકડવા ચક્રો ગતિમાન કર્યા છે. ત્યારે મોરબીનાં નાની વાવડી ગામમાં રૂ.૩,૬૭,૭૫૦/-ની ચોરી થતા ખળભળાટ મચી જવા પામ્યો છે. જે મામલે મોરબી સીટી એ ડિવીઝન પોલીસ સ્ટેશનમાં ફરિયાદ નોંધાઈ છે.
મળતી માહિતી અનુસાર, મોરબી જિલ્લાના નાની વાવડી ગામમાં આવેલ હરી પાર્ક સોસાયટીમાં સમજુબા સ્કુલ પાસે આવેલ વિનોદભાઈ કુંભાભાઈ સોંલકીનાં રહેણાંક મકાનમાં ગત 8 અથવા 9 સપ્ટેમ્બરના રોજ તસ્કરો ત્રાટક્યા હતા. અને મકાનમાં તાળા તોડી ઘરમાં થેલામા રાખેલ સોના દાગીનાના બોક્ષ સહીત સોના-ચાંદીના દાગીના અને ઘરમાં રહેલ રોકડા રૂપિયા ૧,૦૫,૦૦૦/- મળી કુલ રૂ.૩,૬૭,૭૫૦/-ના મુદ્દામાલની ચોરી કરી નાસી ગયા હતા. જેની જાણ થતા જ વિનોદભાઈ કુંભાભાઈ સોંલકી નામના વેપારી દ્વારા મોરબી સીટી એ ડિવીઝન પોલીસ સ્ટેશનમાં ફરિયાદ નોંધાવી છે. ત્યારે પોલીસે ફરિયાદ નોંધી આસપાસના વિસ્તારોના CCTV ફૂટેજ ચકાસી તસ્કરોને પકડવા કાર્યવાહી હાથ ધરી છે.
