વાંકાનેરમાં વધુ એક માર્ગ અકસ્માતની ઘટના સામે આવી છે. જેમાં પુરપાટ ઝડપે જતી આર વન ફાઈવના ચાલકે રાહદારીને હડફેટે લેતા બાઈક ફંગોળાઈ ગઈ હતી. જેના કારણે ચાલકનું સારવાર દરમિયાન મોત નીપજ્યું હતું. જયારે રાહદારી ગંભીર રીતે ઈજાગ્રસ્ત થતા તેને સારવારમાં ખસેડવામાં આવ્યો છે. જે સમગ્ર મામલે વાંકાનેર સીટી પોલીસે ગુન્હો નોંધી આગળની કાર્યવાહી હાથ ધરી છે.
મળતી માહિતી અનુસાર, વાંકાનેરનાં ખખાણા ગામે રહેતા વાલજીભાઇ મોહનભાઇ ગોધાણી નામના વૃધ્ધ ચાલીને વાંકાનેર નવાપરા પાસે શ્રી જી પોલીમર્સ કારખાના સામેનો રોડ ક્રોસ કરતા હતા તે વખતે વિરેન્દ્રસિંહ પઢીયાર (રહે.વીશીપરા વાંકાનેર)એ પોતાનું GJ-03-LC-3220 નંબરનું આર વન ફાઈવ મોટરસાઇકલ પુરજડપે અને ગફલત ભરી રીતે ચલાવી ફરિયાદી સાથે મોટરસાયકલ ભટકાતા ફરિયાદી તથા મોટરસાઇકલ ચાલક ફંગોડાઈ જઈ પડી જતા ફરિયાદીને જમણી બાજુના ગોળાના ભાગે તથા પાસડીના ભાગે ફેકચર જેવી ઈજા પહોંચી હતી તથા બનાવમા મોટરસાઇકલ ચાલકને શરીરે તથા માથાના ભાગે ગંભીર ઈજા થવાના કારણે ચાલુ સારવાર દરમ્યાન તેનું મોત નીપજ્યું હતું. જે સમગ્ર મામલે વાંકાનેર સીટી પોલીસ સ્ટેશનમાં ફરિયાદ નોંધાઈ છે.
