મોરબીમાં માર્ગ અકસ્માતની વધુ એક ઘટના સામે આવી છે. જેમાં એક ટ્રકે મોટરસાઈકલને હડફેટે લેતા મોટરસાઈકલ ચાલક યુવક ગંભીર રીતે ઘવાયો હતો. જેને લઈ યુવકને સારવાર અર્થે ખસેડવામાં આવ્યો હતો. જયારે ટ્રક ચાલક ફરાર થઈ જતા તેના વિરુધ્ધ મોરબી સીટી બી ડિવિઝન પોલીસ સ્ટેશનમાં ફરિયાદ દાખલ કરવામાં આવી છે.
મળતી માહિતી અનુસાર, મોરબીમાં મારકો વિલેજ સોસાયટી ઘુંટુ રોડ ખાતે રહેતો મૂળ બનાસકાંઠાના અશ્વિનકુમાર રમેશભાઇ દવે નામનો યુવક ગત તા-૧૬/૦૯/૨૦૨૩નાં રોજ સવારના સમયે પોતાની GJ-08-CF-6899 નંબરની હીરો સ્પેલ્ડર મોટરસાઇકલ લઇ કારખાને જતો હોય ત્યારે રીજેન્ટા હોટલ સામે કટ પાસે વાંકાનેર મોરબી નેશનલ હાઇવે મોરબી-૨ પહોચતા પાછળથી GJ-12-BW-7440 નંબરનાં ટ્રકના ચાલકે પોતાના હવાલા વાળો ટ્રક પુરઝડપે અને ગફલતભરી રીત ચલાવી ફરિયાદીના મોટરસાઈકલને ટક્કર મારી જમણા હાથ પર ટાયર ફેરવી દઇ હાથમા તથા ડાબા પગના તળીયાના ભાગે ફેકચર જેવી ગંભીર ઇજા તથા શરીરે જમણા પગના સાથળના ભાગે તથા જમણા ખભાના પાછળના ભાગે છોલછાલ જેવી ઇજા પહોચાડીને ટ્રક છોડીને નાશી જતા સમગ્ર મામલે મોરબી સીટી બી ડિવિઝન પોલીસ સ્ટેશનમાં ફરિયાદ નોંધાઈ છે.
