ભારતના વારસા સમાન યોગને વિશ્વભરમાં એક વિશેષ ઓળખ મળી છે. ત્યારે ગુજરાત સરકાર દ્વારા રાજ્યવ્યાપી સૂર્ય નમસ્કાર સ્પર્ધા 2023-24 નું આયોજન કરવામાં આવ્યું છે. આ સ્પર્ધામાં ગુજરાતભરના 13 હજારથી વધુ ગામ અને વિવિધ વિસ્તારના કુલ 8 લાખથી વધુ સ્પર્ધકો જોડાશે. જે અંતર્ગત ગઈકાલે ટંકારાના સજનપર ગામની શ્રી સજનપર પ્રા. શાળામાં પણ સૂર્યનમસ્કાર સ્પર્ધા યોજાઈ હતી.
ટંકારા તાલુકાના સજનપર ગામે ગઈકાલે તા.19/12/2023 ના રોજ રાજ્ય યોગ બોર્ડ દ્વારા ગ્રામ્ય કક્ષાએ સૂર્ય નમસ્કાર સ્પર્ધાનું આયોજન કરવામાં આવ્યું હતું. જેમાં સજનપર પ્રાથમિક શાળાના બાળકોએ ખૂબ જ ઉત્સાહપૂર્વક ભાગ લીધો હતો. તેમજ મંત્રોચ્ચાર સાથે સૂર્યનમસ્કાર કર્યા હતા. અને ગ્રામ્ય કક્ષાએ 19 થી 40 વર્ષના વયજુથમાં સજનપર ગામના જ યુવાન સાગર દલસુખભાઈ ફેફરને શાળાના નોડલ શિક્ષિકા બહેન વિરમગામા મીનાબેન ડી. એ યોગ્ય મૂલ્યાંકન કરી
પ્રથમ ક્રમે વિજેતા જાહેર કર્યા છે. ખૂબ જ ગર્વની વાત છે કે સાગરભાઈ જ્યારે ધો.7 માં હતા ત્યારથી જ તેમણે સંકલ્પ કરેલ હતો કે તે દરરોજ સૂર્ય નમસ્કાર કરીશે અને આ સંકલ્પને સિદ્ધ કરી બતાવેલ અને તેઓ દરરોજના 108 સૂર્યનમસ્કાર કરે છે. સાગરભાઈએ શાળાના બાળકોને સૂર્યનમસ્કાર વિશે ખૂબ જ શ્રેષ્ઠ માહિતી આપી હતી.
