મોરબી-રાજકોટ બાયપાસ પાસે આવેલ ક્રિષ્ના પાર્ટી પ્લોટના વાહન પાર્કિંગના સ્થળે પાર્ક કરેલ બે સુઝુકી કંપનીના ઍક્સેસ મોપેડ કોઈ અજાણ્યા વાહન ચોર ચોરી કરીને લઈ ગયા અંગે સીટી એ ડિવિઝન પોલીસ મથકમાં ફરિયાદ નોંધાઈ છે. હાલ પોલીસે ગુનો નોંધી આરોપી અજાણ્યા ઇસમો તથા ચોરી થયેલ બે મોપેડ અંગે અલગ અલગ દિશામાં તપાસના ચક્રો ગતિમાન કર્યા છે.
મળતી વિગતો અનુસાર, મોરબીના નાની વાવડી ખાતે સમજુબાનગરમાં રહેતા હર્ષભાઈ હિતેશભાઈ કવૈયા ઉવ.૨૫ અને તેનો મિત્ર પંકજભાઈ મહેન્દ્રભાઈ રાઠોડ એમ બન્ને મિત્રો ગત તા. ૦૬ ઓક્ટોબર ૨૦૨૫ ના રોજ મોરબી-રાજકોટ બાયપાસ પાસે આવેલ ક્રિષ્ના પાર્ટી પ્લોટમાં નવરાત્રી મહોત્સવ નિમિતે ગયા હતા, ત્યારે બન્ને મિત્રો અલગ અલગ બે સુઝુકી એક્સએસ મોપેડ જેના રજી.નં. જીજે-૩૬-એએચ-૫૯૯૯ અને જીજે-૩૬-એજી-૧૪૦૦ લઈને ગયા હતા, જે બન્ને મોપેડ ક્રિષ્ના પાર્ટી પ્લોટના પાર્કિંગ સ્થળે પાર્ક કર્યા હતા, જે બાદ રાત્રીના એક વાગ્યે હર્ષભાઈ અને પંકજભાઈ ઘરે પરત જવા પાર્ટી-પ્લોટ બહાર નીકળી, પાર્કિંગમાં ગયા જ્યાં, ઉપરોક્ત બન્ને મોપેડ ત્યાં જોવામાં ન આવતા, મોપેડ માટે આજુબાજુમાં તપાસ કરતા મળેલ નહિ, જેથી નિયમ મુજબ પ્રથમ બન્ને મોપેડની ચોરી માટે ઈ-એફઆઈઆર નોંધાવ્યા બાદ રૂબરૂ વાહન ચોરી અંગે એ ડિવિઝન પોલીસ મથકમાં ફરિયાદ નોંધાવી છે, હાલ પોલીસે આરોપી અજાણ્યા ચોર ઈસમો વિરુદ્ધ ગુનો નોંધી કાયદેસરની કાર્યવાહી હાથ ધરી છે.
