મોરબીની સ્પેશ્યલ પોક્સો કોર્ટે સગીર સાથે સૃષ્ટિ વિરુદ્ધનું કૃત્ય કરવાનાં ગુનામાં આરોપી અક્ષયભાઈ દેગામાને દોષિત ઠેરવી 20 વર્ષની સખ્ત કેદની સજા ફટકારી છે. સાથે જ પીડિતાને વળતર ચૂકવવાનો પણ હુકમ કર્યો છે.
મળતી માહિતી અનુસાર, હળવદ પોલીસ સ્ટેશનમાં ફરિયાદ નોંધાઈ હતી કે, અક્ષયભાઈ રમેશભાઈ દેગામા નામના શખ્સે નવ વર્ષના સગીર બાળકને લાલચ આપી પોતાના સાથે લઈ જઈ તેની સાથે સૃષ્ટિ વિરુદ્ધનું કૃત્ય કરી જાતીય શોષણ કર્યું હતું અને આ ઘટનાની જાણ કોઈને કરશો તો જાનથી મારી નાખવાની ધમકી આપી હતી. આ કેસની સુનાવણી મોરબી સ્પેશ્યલ પોક્સો કોર્ટમાં ચાલી રહી હતી જેમાં સરકારી વકીલ એન.ડી. કારીઆ દ્વારા 12 મૌખિક અને 29 દસ્તાવેજી પુરાવા રજૂ કરવામાં આવ્યા હતા. પુરાવાઓના આધારે અદાલતે આરોપીને દોષિત ઠેરવી IPC કલમ 363 હેઠળ 3 વર્ષની સખ્ત કેદ, IPC કલમ 377 હેઠળ 10 વર્ષની સખ્ત કેદ તેમજ પોક્સો અધિનિયમની કલમ 4 અને 6 હેઠળ 20-20 વર્ષની સખ્ત કેદની સજા ફટકારી છે. આ તમામ સજાઓ એકસાથે ભોગવવાનો હુકમ કરવામાં આવ્યો છે. આ સાથે જ ગુજરાત સરકારની ભોગબનનાર વળતર યોજના મુજબ પીડિતાને રૂ.4,04,000/- વળતર ચૂકવવાનો આદેશ આપવામાં આવ્યો છે.
