મોરબીમાં ગઈકાલે રાત્રે પોલીસને બદલે તસ્કરો નાઈટ કોમ્બિંગમાં નીકળ્યા હોય તેવા ઘાટ વચ્ચે ગઈકાલે મોરબીના સામાકાઠે આવેલ શક્તિ ચેમ્બર ૧ અને ૨ માં દસ કરતા વધુ દુકાનોમાં ચોરી નો પ્રયાસ થતાં ચકચાર મચી જવા પામી હતી. મોરબી સીટી બી ડિવિઝન પોલીસે સમગ્ર મામલે વધુ તપાસ હાથ ધરી છે.
મળતી માહિતી અનુસાર, મોરબીના આરાધના નગર શેરી નં-૦૨ કેનાલ રોડ ખાતે રહેતા મીલનભાઇ જશમતભાઇ ભીમાણી નામના યુવકની શકિત ચેમ્બર્સ ૦૨ મા દુકાન આવેલી છે. જેમાં ગત તા.૨૬/૦૨/૨૦૨૩ ના રોજ રાત્રીના સમયે કોઈ અજાણ્યા ચોર ઈસમે દુકાનોના શટર ઉચકી દુકાનોમા પ્રવેશી દુકાનમા રાખેલ ટેબલના ખાના માથી રોકડ રૂપીયા-૨૨૦૦/- ની ચોરી કરી હતી. આટલું જ નહિ. ફરિયાદીની સાથે સાથે શકિત ચેમ્બર્સ-૦૧ તથા ૦૨ મા આવેલ 10થી વધુ દુકાનોને પણ આ તસ્કરોએ નિશાને લીધી હતી. અને દુકાનોમાથી પરચુરણ રકમની ચોરી કરી હતી. જો કે, આ વિસ્તારમાં મોટાભાગની ઓફિસ ટ્રેડિંગ વ્યવસાયની હોય જેથી દુકાનોમાં કોઈ વધુ રોકડ રકમ રહેતી ન હોય જેથી વધુ ચોરી થઇ ન હતી.
