શહેરના જાહેર માર્ગો પર પ્લાસ્ટિક મુક્તિ અંગેના નારા લગાવાયા; ખેલાડીઓ, ટ્રેનર્સ, બાળકો અને શહેરીજનો જોડાયા.
મોરબી: વિશ્વ પર્યાવરણ દિવસની વર્ષ-૨૦૨૫ની થીમ ‘એન્ડિંગ પ્લાસ્ટિક પોલ્યુશન ગ્લોબલી’ અંતર્ગત મોરબીમાં જીલ્લા રમત પ્રશિક્ષણ કેન્દ્ર દ્વારા મોરબી શહેરમાં વોકથોનનું આયોજન કરવામાં આવ્યું હતું જેમાં બહોળી સંખ્યામાં લોકો જોડાઈ પ્લાસ્ટિક મુક્ત ઝુંબેશને સફળ બનાવવા સહભાગી બન્યા હતા.
૫ જૂનના રોજ વિશ્વ પર્યાવરણ દિવસની ઉજવણી કરવામાં આવનાર છે, આ ઉજવણીના ભાગરૂપે સમગ્ર રાજ્યની સાથે મોરબી જીલ્લામાં પણ ઉજવણી પૂર્વે વિવિધ આયોજનો અને કાર્યક્રમોનું આયોજન કરવામાં આવી રહ્યું છે. આ વર્ષની થીમને ધ્યાને લઈ લોકોને પ્લાસ્ટિક પ્રદુષણ અંગે જાગૃત કરવા તેમજ પ્લાસ્ટિકના વપરાશને નહિવત કરવા વિવિધ પ્રયાસો હાથ ધરવામાં આવી રહ્યા છે. ત્યારે ગત તારીખ ૨૯ મે ૨૦૨૫ના રોજ મોરબી જીલ્લા રમત પ્રશિક્ષણ કેન્દ્ર દ્વારા મોરબીના જાહેર માર્ગો પર રેલી સાથે વોકથોનનું આયોજન કરવામાં આવ્યું હતું. આ વોકથોનમાં લોકો દ્વારા ‘જગતભરમાં પ્લાસ્ટિક પ્રદૂષણનો અંત લાવો’ અને ‘પ્રકૃતિનું જતન અને પર્યાવરણની જાળવણી આપણી જવાબદારી’ સહિતના નારા લગાવવામાં આવ્યા હતા. આ વોકથોન દરમિયાન સર્વે ઉપસ્થિતો દ્વારા રોજિંદા જીવનમાં પ્લાસ્ટિકનો વપરાશ ઘટાડવા તથા આ બાબતે લોકોને જાગૃત કરવા શપથ પણ લેવામાં આવ્યા હતા.
આ વોકથોનમાં જીલ્લા રમત વિકાસ અધિકારી રવિભાઈ રાઠોડ અને જીલ્લા રમત પ્રશિક્ષણ કેન્દ્રનો સ્ટાફ, જીલ્લાના ખેલાડીઓ, રમતના કોચ, વ્યાયામ શિક્ષકો, ટ્રેનર્સ તેમજ બાળકો અને શહેરીજનો જોડાયા હતા
