મોરબીમાં વધુ એક અકસ્માતની ઘટના સામે આવી છે. જેમાં એક યુવક પોતાની બાઈક લઈ વાંકાનેર-મોરબી નેશનલ હાઇવે પરથી પસાર થઇ રહ્યો હતો. ત્યારે રોડ ક્રોસ કરતી વેળાએ તેને એક આઈશર ચાલકે હડફેટે લેતા યુવક ઈજાગ્રસ્ત થયો હતો. જેને લઈ યુવકને સારવારમાં ખસેડવામાં આવ્યો હતો. તેમજ સમગ્ર મામલે મોરબી સીટી બી ડિવિઝન પોલીસ સ્ટેશનમાં ફરિયાદ દાખલ કરવામાં આવી છે.
મળતી માહિતી અનુસાર, મોરબી, વાવડી રોડ,પટેલની વાડી પાસે,વાડી વિસ્તારમાં રહેતા જયેશભાઈ પોપટભાઈ ડાભી ગત તા-૨૭/૦૬/૨૦૨૩ ના રોજ પોતાનું જી.જે.૦૩.એચ.ક્યુ.૫૬૯૫ નંબરનું હીરો આઈ-સ્માર્ટ મોટર સાયકલ લઈ લાલપર આઈ.સી.આઈ.સી.આઈ.મા જતા હોય ત્યારે વાંકાનેર-મોરબી નેશનલ હાઇવે રોડ ઉપર ઉમા ગેરેજ સામે રોડ ક્રોસ કરતા હોય ત્યારે જી.જે.૦૩ એ.ઝેડ. ૪૫૩૨ નંબરના આઈશરના ચાલકે પોતાના હવાલા વાળુ આઈશર પૂરઝડપે ચલાવી મોટર સાયકલને સાઈડેથી ભટકાડી અકસ્માત સર્જી નાશી ગયો હતો. જે અકસ્માતમાં ફરિયાદીને જમણા ડાબા પગે ફેકચર જેવી તેમજ પેટના ભાગે ગંભીર ઈજાઓ તેમજ કપાળના ભાગે જમણી બાજુ ઈજા પહોંચતા તેમને સારવારમાં ખસેડવામાં આવ્યા હતા. તેમજ સમગ્ર મામલે મોરબી સીટી બી ડિવિઝન પોલીસે ગુન્હો નોંધી કાયદેસરની કાર્યવાહી હાથ ધરી છે.
