મોરબીનાં રફાળેશ્વર ચોકડી પાસે ગમખ્વાર અકસ્માત સર્જાયો હતો. જેમાં પુરપાટ ઝડપે જઈ રહેલ બાઈકે રાહદારી યુવકને હડફેટે લેતા યુવક ગંભીર રીતે ઘવાયો હતો. જેના કારણે તેને હોસ્પિટલમાં સારવાર અર્થે ખસેડવામાં આવ્યો હતો. તેમજ સમગ્ર મામલે ઈજાગ્રસ્ત યુવકના પિતા દ્વારા મોરબી તાલુકા પોલીસ સ્ટેશનમાં ફરિયાદ દાખલ કરવામાં આવી છે.
મળતી માહિતી અનુસાર, મોરબીના પ્રેમજીનગર ખાતે રહેતા કાન્તીભાઇ પ્રેમજીભાઇ ચાવડા દ્વારા મોરબી તાલુકા પોલીસ સ્ટેશનમાં જીજે-36-કે-5678 નંબરના મોટરસાઇકલ ચાલક વિરુધ્ધ ફરિયાદ દાખલ કરાવવામા આવી છે. જેમાં તેમના દ્વારા જણાવવામાં આવ્યું છે કે, ફરિયાદીનો પુત્ર પ્રકાશ ઉર્ફે પંકજ રફાળેશ્વર ચોકડી પાસેથી પસાર થઈ રહ્યો હતો. ત્યારે GJ-36-K-5678 નંબરની મોટરસાઇકલનાં ચાલકે પુરપાટ ઝડપે પોતાનું વાહન ચલાવી નીકળી મોરબી વાંકાનેર નેશનલ હાઇવે રોડ રોડ ક્રોસ કરતા પ્રકાશ ઉર્ફે પંકજને હડફેટમાં લઇ વાહન અકસ્માત કરી યુવકને બંને પગમાં ફેકચર જેવી તથા પેટમાં તથા શરીરે છોલછાલ જેવી ઇજાઓ પહોચાડી છે. જે સમગ્ર મામલે પોલીસે ફરિયાદના આધારે આગળની કાર્યવાહી હાથ ધરી છે.
