મોરબીમાં રાજસ્થાનથી માટીની આડમાં વિદેશી દારૂ ઘુસાડવાના મનસૂબા ઉપર મોરબી ક્રાઇમ બ્રાંચ ટીમે પાણી ફેરવી દીધું હતું, જેમાં રાજસ્થાનથી ટ્રક-ટ્રેઇલરમાં સફેદ માટી નીચે છુપાવીને લઈ આવતા કિંગફિશર બિયરના ૧૧૨ ટીન સાથે ટ્રક ટ્રેઇલર ચાલકની અટકાયત કરવામાં આવી છે, આ સાથે ક્રાઇમ બ્રાંચ પોલીસે ટ્રક, બિયરના ટીન, મોબાઇલ સહિત કુલ ૩૦.૧૮ લાખનો મુદ્દામાલ જપ્ત કરવામાં આવ્યો છે.
મોરબી ક્રાઇમ બ્રાંચ પોલીસ ટીમને બાતમી મળેલ કે મોરબી-માળીયા(મી) હાઇવે ઉપર મરક્યુના સીરામીક સામે ઉભેલ ટ્રક ટ્રેઇલરમાં માટીની આડમાં વિદેશી દારૂ-બિયરનો જથ્થો ભરેલ છે, જેથી તુરંત ઉપરોક્ત સ્થળે ટીમ સાથે દરોડો પાડતા, ટ્રક ટ્રેઇલર રજી.નં. આરજે-૨૧-જીડી-૦૯૩૦ ની તલાસી લેવામાં આવી હતી, જેમાં સફેદ માટી ભરેલ હોય જે માટી હટાવીને જોતા, તેમાંથી કિંગફિશર બિયરના ૧૧૨ ટીન કિ.રૂ. ૧૨,૯૯૨/-મળી આવ્યા હતા, જેથી ટ્રક ટ્રેઇલર ચાલક આરોપી રાજેન્દ્ર કાનારામભાઈ બાંગળા ઉવ.૩૬ રહે.બીટન તા.મેડતા જી.નાગોર રાજસ્થાન વાળની અટકાયત કરવામાં આવી હતી. આ સાથે પોલીસે બિયરના ટીનની હેરાફેરીમાં ઉપયોગમાં લેવાતો ટ્રક-ટ્રેઇલર કિ.રૂ.૩૦ લાખ, એક મોબાઇલ કિ.રૂ.૫,૦૦૦/-સહિત કુલ રૂ.૩૦,૧૭,૯૯૨/-નો મુદ્દામાલ કબ્જે લઈ આગળની કાર્યવાહી હાથ ધરી છે.
