રાજકોટ રેન્જ આઈ.જી. અશોકુકમાર યાદવે સમગ્ર રાજકોટ રેન્જમાં દારૂ/જુગારની પ્રવૃતિ નેસ્ત નાબૂદ કરવા સ્પે. ડ્રાઇવનું આયોજન કરેલ હોય જે ડ્રાઇવ દરમ્યાન અસરકારક કામગીરી કરવા સૂચન મળતા મોરબી શહેરમાં આવેલ માધાપર વિસ્તારમાં રહેણાંક મકાનમાંથી જુગાર રમતા આઠ ઇસમોને મોરબી ક્રાઈમ બ્રાન્ચ દ્વારા પકડી પાડી કાયદેસરની કાર્યવાહી હાથ ધરવામાં આવી છે.
મળતી માહિતી અનુસાર, મોરબી ક્રાઈમ બ્રાન્ચની ટીમને ખાનગી બાતમી રાહે મળેલ હકિકત આધારે મોરબી માધાપર શેરી નં-૨૯ માં આવેલ વિજય બાબુભાઇ વીંજવાડીયાના રહેણાંક મકાનેથી વિજયભાઇ બાબુભાઇ વીંજવાડીયા, અજયભાઇ સામજીભાઇ જિંજવાડીયા, લક્ષમણભાઇ ગોકળભાઇ ટોટા, શાહરૂખભાઇ ફીરોજભાઇ પઠાણ, જયપાલભાઇ મુળજીભાઇ કુંવરીયા, આરીફભાઇ હુશેનભાઇ ચૌહાણ, અજયભાઇ મનસુખભાઇ વરાણીયા તથા ઉમેશભાઇ ટીડાભાઇ ગોલતર નામના ઇસમોને ગંજીપતાના પાના અને પૈસા વતી પૈસાની હારજીતનો તીન પતીનો રોન પોલીસનો જુગાર રમતા રોકડા રૂ.૫,૩૪,૦૦૦/-ના મુદ્દામાલ સાથે પકડી પાડી મોરબી સિટી એ ડિવિઝન પોલીસ સ્ટેશન ખાતે જુગાર ધારા મુજબની કાર્યવાહી હાથ ધરવામાં આવી છે.
