મોરબીમાં માર્ગ અકસ્માતની વધુ એક ઘટના સામે આવી છે. જેમાં GJ-36-T-3668 નંબરનાં વાહનના ચાલકે પુરપાટ ઝડપે પોતાનું વાહન ચલાવી બાઇકને હડફેટે લેતા બાઈક ચાલક યુવક ગંભીર રીતે ઘવાયો હતો. જેથી તેને સારવાર અર્થે હોસ્પિટલ ખસેડવામાં આવ્યો હતો. જયારે આરોપી વાહન સ્થળ પર મૂકી ફરાર થઈ જતા તેને પકડવા પોલીસ દ્વારા ચક્રો ગતિમાન કરવામાં આવ્યા છે.
મળતી માહિતી અનુસાર, મોરબીના મચ્છોનગર, પ્રાથમિક શાળા પાછળ, પાણીના ટાંકા પાસે રહેતો પરસોતમભાઇ દેવજીભાઇ ત્રીકમભાઇ મકવાણા ગઈકાલે સવારના સમયે પોતાની હીરો સ્પ્લેન્ડર પ્લસ મોટર સાયકલ લઈ પાનેલી રોડ મચ્છોનગર ગામમાં જવાની ગોલાઇમાં પાટીદાર કટીંગના ડેલા પાસેથી પસાર થઈ રહ્યો હતો. ત્યારે પુરપાટ ઝડપે આવતા GJ-36-T-3668 નંબરના વાહનના ચાલકે યુવકને હડફેટે લેતા યુવકને ડાબા પગમાં ઢીંચણથી નીચેના ભાગે ફ્રેક્ચરની ઇજા તથા ડાબા હાથના પંજામાં ઇજા પહોંચી હતી. જયારે આરોપી પોતાના હવાલાનું વાહન સ્થળ ઉપર રેઢુ મુકી ફરાર થઇ જતા સમગ્ર મામલે મોરબી તાલુકા પોલીસ સ્ટેશનમાં ફરિયાદ દાખલ કરવામાં આવી છે.
