મોરબીમાં મોડી રાત્રે કરિયાણાની દુકાનમાં બની આગજનીની ઘટના : લાખો રૂપિયાનો સમાન આગમાં ભસ્મીભૂત

મોરબીમાં મોડી રાત્રે કરિયાણાની દુકાનમાં આગની ઘટના બની હતી. કરિયાણાની દુકાનમાં આગ લાગતા અફરા-તફરીનો માહોલ સર્જાયો હતો. જો કે, ફાયર વિભાગની ટીમને જાણ કરતા તે પણ ઘટનાસ્થળે દોડી આવી હતી અને આગ પર કાબૂ મેળવ્યો હતો.

મળતી માહિતી અનુસાર, મોરબીમાં મોડી રાત્રે ડી. એન. નામની કરિયાણાની દુકાનમાં અગમ્ય કારણોસર આગ લાગી હતી. અને આ આગે જોત જોતામાં જ વિકરાળ સ્વરૂપ ધારણ કરી લીધું હતું. ત્રણ માળની આ દુકાનમાં આગ પ્રસરી જતાં આખી દુકાનમાં રહેલ લાખો રૂપિયાનો સમાન આગમાં ભસ્મીભૂત થયો હતો. ત્યારે આગ લાગવા અંગે ફાયર વિભાગની ટીમને જાણ થતા જ તેઓએ તાત્કાલિક ઘટનાસ્થળે પહોંચી પાણીનો મારો ચલાવી પાંચ કલાકની જહેમત બાદ આગ પર કાબુ મેળવ્યો હતો. જોકે સદ્નસીબે આ આગમાં જાનહાની થઈ નથી.