મોરબીમાં યુવકે મિલ્કત લે – વેચ નો ધંધો કરતા એક શખ્સને રૂ.૬,૫૦,૦૦૦/- આપ્યા હતા. જે રકમ પરત માંગતા આરોપીએ ચેક આપ્યો હતો. જે ચેક બાઉન્સ થતા યુવકે આરોપી વિરુધ્ધ કેસ દાખલ કરતા મોરબી કોર્ટ દ્વારા ચેક રીટર્નના કેસમાં આરોપીને બે વર્ષની કેદની સજા, ડબલ રકમનો દંડ અને ફરીયાદીને ચેકની રકમ ૯% વ્યાજ સહિત વળતર પેટે ચૂકવવાનો આદેશ આપ્યો છે.
મળતી માહિતી અનુસાર, મોરબીના રહેવાસી બ્લોચ ઈમ્તિયાઝ અહેમદ મોરબીમાં મિલ્કત લે – વેચ નો ધંધો કરે છે. તેણે મિલ્કતમાં રોકાણ કરવા માટે, ફરીયાદી હઝારી મુસ્તફા નુરૂદિનનો સંપર્ક કર્યો હતો અને મિલ્કતમાં રોકાણ કરવા માટે રૂ.૬,૫૦,૦૦૦/- મેળવી અને મિલ્કતમાં રોકાણ કરવાથી રૂ. ૨,૫૦,૦૦૦/- નો ફાયદો થશે તેવું જણાવ્યું હતું અને તેના બદલામાં રૂ.૯,૦૦,૦૦૦/- નો ચેક આપ્યો હતો. પરંતુ, લાંબા સમય સુધી, આરોપી બ્લોચ ઈમ્તિયાઝે કોઈ મિલ્કત ખરીદ નહીં કરતા, ફરીયાદીએ તેમની રકમ પરત ચૂકવી આપવા, આરોપીને જણાવ્યું છે, ત્યારે આરોપીએ, ફરીયાદીને આપેલ ચેક બેંકમાં રજુ કરવા જણાવતા, આરોપીએ, ફરીયાદીને આપેલ ચેક પોતાના ખાતામાં રજુ કર્યો હતો અને રજુ કરતી વખતે તે ચેક માહેથી રૂ.૬,૫૦,૦૦૦/- માત્ર વસુલ આપવાનો શેરો મારતા, આ ચેક, અપૂરતા ભંડોળના કારણે પરત ફરતા ફરીયાદીએ આરોપીને તેની રકમ વસુલ મેળવવા માટે કાનૂની નોટીસ પાઠવી હતી. જે નોટીસ આરોપીએ “રીફયુઝડ” કરતા ફરીયાદીએ આરોપી વિરૂધ્ધ મોરબી કોર્ટમાં ફોજદારી કેસ દાખલ કર્યો હતો અને આ કેસ ચાલી જતા ફરીયાદી દ્વારા રજુ થયેલા પુરાવાઓ અને ફરીયાદીના વકીલ ચિરાગ ડી. કારીઆ દ્વારા કરવામાં આવેલ દલીલો તથા રજુ રાખેલ સુપ્રિમ કોર્ટના ચુકાદાઓને ધ્યાને લઈને મોરબીના જયુડીશ્યલ મેજીસ્ટ્રેટ ફર્સ્ટ કલાસ (એસ.એ. મેમણ મેડમ) ની કોર્ટે આરોપી ઈમ્તિયાઝ અહેમદ બ્લોચને બે વર્ષની કેદની સજા અને રૂા.૧૩,૦૦,૦૦૦/- નો દંડ અને દંડની રકમમાંથી, ચેકની રકમ ઉપર ફરીયાદીને ફરીયાદ દાખલ કર્યા તારીખથી ૦૯% સાદા વ્યાજ સહીત વળતર પેટે ૩૦ દિવસમાં ચૂકવી આપવાનો તેમજ આ વળતરની રકમ ચૂકવવામાં કસૂર કર્યેથી વધુ ૯૦ દિવસની કેદની સજા ફરમાવવાનો આદેશ આપ્યો છે. આ કેસમાં ફરીયાદ પક્ષે વકીલ તરીકે ચિરાગ ડી. કારીઆ તથા રવી કે. કારીયા રોકાયેલ હતા.
