રેલ્વે રિક્રુટમેન્ટ બોર્ડ પરીક્ષાની તૈયારીઓ માટે ઇચ્છુક ઉમેદવારો ૧૫ એપ્રિલ સુધીમાં morbidp.gujarat.gov.in વેબસાઇટ પર ઓનલાઈન અરજી કરવી.
મોરબી જીલ્લા પંચાયત કચેરી દ્વારા ભારત સરકારના રેલવે મંત્રાલયના રેલ્વે રિક્રુટમેન્ટ બોર્ડની વિવિધ પોસ્ટ માટે આગામી સમયમાં મોક ટેસ્ટનું આયોજન કરવામાં આવનાર છે. આ મોક ટેસ્ટ માટે ઉમેદવારો પાસેથી અરજીઓ મંગાવવામાં આવી છે.
તાજેતરમાં ભારત સરકારના રેલવે મંત્રાલયના રેલ્વે રિક્રુટમેન્ટ બોર્ડ દ્વારા Centralised Employment Notification (CEN) No.08/2024 થી Group – “D” (Level-1) ની એસ.એસ.સી./આઈ.ટી.આઈ./ડિપ્લોમા પાસ થયેલ હોય તેવા અને ૧૮ વર્ષથી વધુ ઉંમર ધરાવતા ઉમેદવારો માટે ૧૪ જેટલી અલગ અલગ ટેકનિકલ પોસ્ટની કુલ ૩૨,૪૩૮ જગ્યા માટેની ભરતી અંગેની જાહેરાત પ્રસિદ્ધ કરી પાત્રતા ધરાવતા ઉમેદવારો પાસેથી ઓનલાઇન અરજી મંગાવવામાં આવી હતી જેમાં ઓનલાઇન અરજી કરવાની છેલ્લી તા.૦૧/૦૩/૨૦૨૫ હતી.
મોરબી જીલ્લામાં પાત્રતા ધરાવતા ઉમેદવારોને વધુમાં વધુ રોજગારી મળી રહે અને યુવા વર્ગ સરકારી સેવામાં જોડાઇ પગભર બને તેવા ઉમદા હેતુથી મોરબી જીલ્લા પંચાયત કચેરી દ્વારા જીલ્લાના વધુને વધુ યુવાઓ ઓનલાઇન અરજી કરવા પ્રેરાય અને તેઓને રોજગારી મળે તે માટે સ્પેશ્યલ ડ્રાઈવ યોજવામાં આવી હતી. જેમાં મોરબી જીલ્લામાં અંદાજે ૧૦૦૦ જેટલા યુવક/યુવતીઓએ ઓનલાઇન અરજી કરેલ હતી. જેથી જીલ્લા પંચાયત કચેરી દ્વારા આવા ઓનલાઇન અરજી કરનાર ઉમેદવારો લેખીત પરીક્ષામાં સફળ થાય તે માટે આગામી સમયમાં મોક ટેસ્ટ લેવાનું આયોજન કરવામાં આવ્યું છે. જેથી મોક ટેસ્ટ આપવા ઇચ્છતા ઉમેદવારોને જીલ્લા
પંચાયત મોરબીની વેબસાઇટ morbidp.gujarat.gov.in પર તા.૧૫/૦૪/૨૦૨૫ના રાત્રીના ૧૨/૦૦ વાગ્યા સુધીમાં ઓનલાઇન રજીસ્ટ્રેશન કરવા જીલ્લા પંચાયતની યાદીમાં જણાવવામાં આવ્યું છે.
