મોરબી સાયબર ક્રાઇમ ટીમને મળેલી સફળતામાં શેરમાર્કેટમાં ઊંચા નફાની લાલચ બતાવી સોશિયલ મીડિયા અને વ્હોટ્સએપ ગ્રુપ મારફતે રૂ.૪૮.૧૪ લાખનો સાયબર ફ્રોડ આચરનાર ગેંગના ચાર સભ્યોને મોરબી સાયબર ક્રાઇમ ટીમે ટેકનિકલ તપાસના આધારે ઝડપી પાડ્યા હતા.
મોરબી જીલ્લામાં વધી રહેલા સાયબર ક્રાઇમના બનાવોને રોકવા અને બનેલી ફરિયાદોના તરત ભેદ ઉકેલવા મોરબી સાયબર ક્રાઇમ પોલીસ સતત સક્રિય છે. છેલ્લા ઘણા સમયથી સાયબર ઠગો શેરમાર્કેટમાં રોકાણ કરાવવાની લાલચ આપી લોકો પાસેથી મોટી રકમ પડાવી લેતા ફ્રોડના બનાવોમાં વધારો નોંધાયો છે. જેમાં ફરિયાદીનો વિશ્વાસ જીતી લેવા માટે ઠગોએ સોશ્યલ મીડિયા મારફતે સંપર્ક કર્યો અને તેમને “Y96 SIG Customer Service” નામના વ્હોટ્સએપ ગ્રુપમાં જોડ્યા હતા. ત્યારબાદ લોભામણી અને લલચામણી સ્કીમો બતાવી સ્ટોક એક્સચેન્જમાં રોકાણના બહાને ફરિયાદી પાસેથી કુલ રૂ.૪૮,૧૪,૦૦૦/- ટ્રાન્સફર કરાવી લઈને મોટો સાયબર ફ્રોડ આચર્યો હતો. આ અંગે સાયબર ક્રાઇમ પોલીસ સ્ટેશનમાં ભારતીય ન્યાય સંહિતા તથા આઇટી એક્ટ હેઠળ ગુનો નોંધાયો હતો.
ત્યારે ગુનાની ગંભીરતાને ધ્યાને લઈને મોરબી સાયબર ક્રાઇમ ટીમે ટેકનિકલ તપાસના આધારે ફ્રોડ આચરનાર ગેંગ અંગે મહત્વની માહિતી મેળવી અને અલગ-અલગ ટીમ રચીને સાયબર ફ્રોડ આચરનાર ગેંગના ચાર આરોપીઓ રાહુલ હર્ષદભાઇ ચૌધરી, ખુશ નવીનભાઇ ભાલોડીયા, જયદિપ રામભાઇ લગારીયા તથા શ્યામ કિશોરભાઇ રૂપાપરાને ઝડપી પાડ્યા છે. આ સમગ્ર કામગીરીમાં મોરબી સાયબર ક્રાઇમ પોલીસ મથક પીઆઇ તથા ટીમે મહત્વની ભૂમિકા ભજવી હતી.
આ સાથે પોલીસે પ્રજાજનોને ચેતવણી આપતા જણાવ્યું છે કે, ગઠિયાઓ લાંબા સમયથી શેરમાર્કેટમાં રોકાણ કરાવી ત્વરિત મોટા નફાના વાયદા કરીને લોકોના પૈસા પડાવી લેતા હોય છે. તેથી આવી લાલચભરી સ્કીમોમાં ન ફસાવવું, અજાણ્યા લિન્ક, એપ્લિકેશન અથવા ગ્રુપમાં જોડાયા વગર સતર્ક રહેવું એવો સંદેશ પોલીસ દ્વારા આપવામાં આવ્યો છે.
