રાજકોટ રેન્જ આઇ.જી. અશોક કુમાર યાદવ તથા મોરબી જિલ્લા પોલીસ એસપી રાહુલ ત્રિપાઠીએ નાસતા ફરતા આરોપીઓને પકડી પાડવા સૂચન કરેલ હોય જે અન્વયે કામગીરી કરતા દરમિયાન મોરબી એલ.સી.બી. ટીમ દ્વારા વાંકાનેર તાલુકા પોલીસ સ્ટેશનના ઇંગ્લીશ દારૂના ગુનામાં છેલ્લા ૧૩ વર્ષથી નાસતા ફરતા આરોપીને તળાજા, ભાવનગર ખાતેથી પકડી પાડી કાયદેસરની કાર્યવાહી હાથ ધરવામાં આવી છે.
મળતી માહિતી અનુસાર, મોરબી એલ.સી.બી.ની પેરોલ ફર્લોની ટીમને ખાનગીરાહે હકિકત મળેલ કે, વાંકાનેર તાલુકા પોલીસ સ્ટેશનના ઈંગ્લીશ દારૂના ગુનાનો નાસતો ફરતો આરોપી ઉમેદસિંહ ઉર્ફે ઉધમસિંહ તેજસિંહ રાવ (રહે. ભટવારા તા.જી.સલુંમ્બર (રાજસ્થાન)) હાલે ભાવનગર જીલ્લાના તળાજા વિસ્તારમાં હોવાની મળેલ ચોકકસ હકિકતનાં આધારે ભાવનગર, તળાજા વિસ્તારમાં મહુવા-ભાવનગર રોડ, ઉપર આવેલ ચામુંડા હોટલ ખાતે તપાસ કરતા નાસતો ફરતો આરોપી ઉમેદસિંહ ઉર્ફે ઉધમસિંહ મળી આવતા આરોપીને હસ્તગત કરી વાંકાનેર તાલુકાના ઈંગ્લીશ દારૂના ગુનાના કામે સી.આર.પી.સી.કલમ ૪૧(૧)(આઇ) મુજબ અટક કરી આગળની કાર્યવાહી અર્થે વાંકાનેર તાલુકા પોલીસને સોપવા કાર્યવાહી હાથ ધરવામાં આવી છે.
