આ સાથે બાકીદારોને ઝડપથી વેરો ભરવાની અપીલ કરાઈ.
મોરબી મહાનગરપાલિકાએ પ્રોપર્ટી ટેક્સ અને વ્યવસાયવેરાની ભરપાઈ માટે ઓનલાઈન વેબસાઇટ, મોબાઇલ એપ્લિકેશન ઉપરાંત કુલ ૧૧ ક્લસ્ટર ઓફિસોમાં ટેક્સ સ્વીકારવાની વ્યવસ્થા શરૂ કરી છે. ૫૦ હજારથી વધુ બાકીદારને માંગણા નોટિસ આપવામાં આવી રહી છે અને ટૂંક સમયમાં વોરંટ બજાવી મિલકત સીલ કરવાની કાર્યવાહી હાથ ધરાશે. સાથે સાથે નાગરિકોને વહેલી તકે વેરો ભરવાની અપીલ કરવામાં આવી છે.
મોરબી મહાનગરપાલિકા વિસ્તારમાં પ્રોપર્ટી ટેક્સ અને વ્યવસાયવેરા ભરવાની પ્રક્રિયાને સરળ અને પારદર્શક બનાવવા મહાનગરપાલિકા દ્વારા ઓનલાઈન તથા ઓફલાઈન બંને માધ્યમથી સુવિધાઓ ઉપલબ્ધ કરાવવામાં આવી છે. હાલ અરજદારો મહાનગરપાલિકાની સત્તાવાર વેબસાઈટ અને મોબાઇલ એપ્લિકેશન મારફતે પોતાની મિલકતનો વેરો સરળતાથી ઓનલાઈન ભરી શકે છે. મહાનગરપાલિકાની ઓફિસ ખાતે પણ EC સ્વીકારવાની કામગીરી દરરોજ સવારે ૧૦.૩૦ થી સાંજે ૫ વાગ્યા સુધી ચાલુ રહે છે. વેરા ભરપાઈ માટે મહાનગરપાલિકા દ્વારા શહેરના વિવિધ વિસ્તારોમાં કુલ ૧૧ ક્લસ્ટર ઓફિસો નિર્ધારિત કરવામાં આવી છે, જ્યાં સવારે ૧૦.૩૦ થી સાંજે ૪ વાગ્યા સુધી ટેક્સ સ્વીકારવામાં આવશે. જેમાં નાની વાવડી, અમરેલી, મહેન્દ્રનગર, ભડીયાદ, ત્રાજપર, ગ્રીનચોક લાઇબ્રેરી, વાંકાનેર દરવાજા પાસે વિશ્વકર્મા બાલમંદિર, શનાળા, રવાપર અને લીલાપર ગ્રામ પંચાયત ઓફિસોનો સમાવેશ થાય છે. નાગરિકોની સગવડતા માટે મુખ્ય કચેરીમાં રૂમ નં. ૯ માં POS મશીન દ્વારા પણ ટેક્સ સ્વીકારવાની શરૂઆત કરવામાં આવી છે.
મહાનગરપાલિકા તરફથી જણાવ્યું છે કે હાલમાં ટેક્સ શાખા દ્વારા રૂ.૫૦ હજારથી વધુ બાકીદારને માંગણા નોટિસ આપવામાં આવી રહી છે અને ટૂંક સમયમાં વોરંટ બજાવવાની કાર્યવાહી કરીને વેરો ન ભરનારી મિલકતોને સીલ કરવાની પ્રક્રિયા શરૂ થશે. તેથી તમામ મિલકતધારકોને સમયસર વેરો ભરવા વિનંતી કરવામાં આવે છે. ડિજિટલ સુવિધાઓને પ્રોત્સાહન આપવા મોરબી મહાનગરપાલિકાએ પોતાની સત્તાવાર વેબસાઇટ તથા મોબાઇલ એપ્લિકેશન પણ શરૂ કરી છે. Play Store માં Morbi Municipal Corporation નામે ઉપલબ્ધ એપ્લિકેશન દ્વારા મિલકત નંબર દાખલ કરતાં પ્રોપર્ટી ટેક્સ અને વ્યવસાયવેરો તાત્કાલિક ઓનલાઈન ભરી શકાય છે. અત્યાર સુધીમાં કુલ ૫,૪૯૨ નાગરિકો ઓનલાઈન ટેક્સ ચૂકવી આ સુવિધાનો લાભ લઇ ચૂક્યા છે. નાગરિકોને ઝડપી, સુવ્યવસ્થિત અને પારદર્શક સેવાઓ આપવા મહાનગરપાલિકા સતત પ્રયત્નશીલ છે અને તમામ મિલકતધારકો/ભોગવટેદારોને તાત્કાલિક વેરો ભરવા તથા ઓનલાઈન સેવાઓનો લાભ લેવા જાહેર અપીલ કરવામાં આવી છે.
