સોલાર પેનલ લગાવતા ધંધાર્થી પાસેથી વચેટિયા મારફતે લાંચ લેતા એસીબીના છટકામાં ઝડપાયા
મોરબી : એક તરફ સરકાર સોલાર ઉર્જા માટે સબસીડી સહિતના પ્રોત્સાહન આપીને લોકોમાં સૌર ઉર્જાનો ઉપયોગ વધારવા પ્રયાસ કરી રહી છે, ત્યારે બીજી તરફ મોરબી પીજીવીસીએલના ક્લાસ-વન અધિકારી સોલાર પેનલ લગાવનારા ધંધાર્થી પાસેથી વચેટિયા મારફતે લાંચ લેતા રંગેહાથ ઝડપાયા હોવાનો ગંભીર કિસ્સો સામે આવ્યો છે.
વિગતો મુજબ મોરબીમાં સોલાર પેનલ લગાવતી કંપનીના સંચાલકે બે અલગ અલગ જગ્યાએ સોલાર પ્લાન્ટનું કામ પૂર્ણ કર્યું હતું. આ બંને પ્લાન્ટમાં સમયસર ઈલેક્ટ્રિક મીટર લગાવવા તેમજ કોઈ પ્રકારની હેરાનગતિ ન થાય તે માટે મોરબી પીજીવીસીએલના નાયબ ઈજનેર (ક્લાસ-વન અધિકારી) મિનેષભાઈ અરજણભાઈ જાદવે ફરિયાદી પાસે રૂ. ૨૦,૦૦૦ ની લાંચની માંગણી કરી હતી.
ફરિયાદી લાંચની રકમ આપવાની ઈચ્છા ન હોવાથી તેણે રાજકોટ ગ્રામ્ય એસીબીનો સંપર્ક કરી ફરિયાદ નોંધાવી હતી. ત્યારબાદ એસીબીએ શુક્રવારે સાંજે લાંચનું છટકું ગોઠવ્યું.
છટકાની કાર્યવાહી દરમિયાન નાયબ ઈજનેર મિનેષભાઈ જાદવએ ફરિયાદી સાથે હેતુલક્ષી વાતચીત કરી અને ગેરકાયદેસર રકમ પીજીવીસીએલ કચેરી નજીક આવેલા પ્રવીણભાઈ નામના વચેટિયા મારફતે સ્વીકારવાની વાત કરી. ફરિયાદી પાસેથી પ્રવીણભાઈએ રૂ. ૨૦,૦૦૦ની લાંચ સ્વીકારતા જ એસીબી ત્રાટકી હતી અને સ્થળ પરથી આરોપીને ઝડપ્યા હતા.
આ કાર્યવાહી એસીબીના ટ્રેપિંગ અધિકારી પીઆઈ જે.એમ. આલ અને તેમની ટીમ દ્વારા હાથ ધરાઈ હતી. લાંચના છટકામાં પીજીવીસીએલના ક્લાસ-વન અધિકારી વચેટિયા મારફતે પકડાતા મોરબી વીજ વિભાગમાં ચકચાર મચી ગઈ હતી અને મામલો સીધો કોર્પોરેટ કચેરી તથા એમડી સુધી પહોંચ્યો હતો.
સરકારની સ્વચ્છ ઉર્જા યોજના હેઠળ પ્રજાજનોને સોલાર પેનલ લગાવવા માટે પ્રોત્સાહિત કરવામાં આવે છે, ત્યારે આવા ભ્રષ્ટાચારના કિસ્સાઓ એ પ્રણાલીની વિશ્વસનીયતાને આંચકો પહોંચાડે છે.
