મોરબીની પાટીદાર યુવા સેવા સંઘ દ્વારા મોરબી જિલ્લા એસ.પી.ને પત્ર લખી ગરબા કલાસીસની નોંધણી અને ભાઇઓ-બહેનોને અલગ સમયે ગરબા કલાસ રાખવા રજૂઆત કરવામાં આવી છે. ગરબા ક્લાસીસની આડમાં બેન-દીકરી સાથે કોઈ રોમિયા કે લૂખ્ખાં તત્વો કોઈ બેન-દીકરીને હેરાન પરેસાન ના કરે તેમજ કોઈ અનિચ્છનીય ઘટના ન બને તે માટે રજૂઆત કરવામાં આવી છે.
મોરબીની પાટીદાર યુવા સેવા સંઘ દ્વારા મોરબી જિલ્લા એસ.પી. રાહુલ ત્રિપાઠીને રજૂઆત કરતા જણાવવામાં આવ્યું હતું કે, આવનાર દિવસોમાં માતાજીની આરાધનાનુ પર્વ એટલે મહા નવરાત્રી પર્વ આવી રહી છે. જેના કારણે મોરબી શહેર તેમજ આજુ-બાજુના વિસ્તારમાં ગરબા ક્લાસીસ ચાલુ થઈ ગયા છે. આ ગરબા કલાસીસની મંજૂરી લેવામાં આવે અને જેટલા ગરબા ક્લાસીસ ચાલે છે. તેનું રજીસ્ટર પણ કરવામાં આવે. સાથે તેમા શિખવા આવતા ભાઈઓ-બહેનોની નોંધણી કરવામાં આવે જેથી કરી કોણ કોણ ગરબા શિખવા આવે તેની સંપુર્ણ માહીતી રહે. આ સાથે પાટીદાર યુવા સેવા સંધ દ્વારા ગરબા ક્લાસીસમાં બહેનો તથા ભાઈઓનો સમય અલગ રાખવામાં આવે ભાઈઓ તથા બહેનોના અલગ અલગ ગ્રુપ બનાવીને ગરબા ક્લાસીસમાં આયોજકો ગરબા શીખવાડે તેવી માંગ કરવામાં આવી છે. આ માંગ પાછળનું કારણ જણાવતા પાટીદાર યુવા સેવા સંધ દ્વારા જણાવવામાં આવ્યું હતું કે, ગરબા ક્લાસીસની આડમાં બેન-દીકરી સાથે કોઈ રોમિયા કે લૂખ્ખાં તત્વો કોઈ બેન-દીકરીને હેરાન પરેસાન ના કરે તેમજ કોઈ અનિચ્છનીય ઘટના ન બને. આ સાથે આવા ગરબા કલાસીસમાં મહિલા પોલીસ સીવીલ ડ્રેસમાં તેની મુલાકાત લે. તેમજ આવા કલાસીસમાં પોલીસ દ્વારા પેટ્રોલીંગ કરવામાં આવે. તેથી આવા ગરબા કલાસીસની આજુબાજુ કોઇ રોમીયા કે આવારા તત્વોની પ્રવૃતિ પર રોક લાગે તેવી માંગ કરાઈ છે.
