મોડેલ સ્કૂલ મોટી બરારમાં તાલુકા કક્ષાનું બાળ વૈજ્ઞાનિક પ્રદર્શન યોજાયું જેમાં વિદ્યાર્થીઓએ વિજ્ઞાનના વિવિધ સિદ્ધાંતો પર આધારિત ૨૫ સર્જનાત્મક કૃતિઓ રજૂ કરી હતી. વિદ્યાર્થીઓએ પોતાની કૃતિઓની રચના, કાર્યપદ્ધતિ અને ઉપયોગીતાની વિસ્તૃત સમજ આપી હતી. જીલ્લા અને તાલુકા સ્તરના અધિકારીઓ સહિત અનેક આગેવાનોની હાજરીમાં કાર્યક્રમ સફળતાપૂર્વક સંપન્ન થયો હતો.
માળીયા તાલુકાના મોટી બરાર ગામમાં આવેલી મોડેલ સ્કૂલ ખાતે બીઆરસી ભવન-માળીયા દ્વારા તેમજ જીલ્લા શિક્ષણ અને તાલીમ ભવન મોરબીના માર્ગદર્શન હેઠળ તાલુકા કક્ષાનું બાળ વૈજ્ઞાનિક પ્રદર્શન ભવ્યતા સાથે યોજાયું હતું. જીસીઆરટી પ્રેરિત આ કાર્યક્રમનો મુખ્ય ઉદ્દેશ વિદ્યાર્થીઓમાં વૈજ્ઞાનિક દ્રષ્ટિકોણ વિકસે, વૈજ્ઞાનિક સિદ્ધાંતોને સમજવા સાથે તેઓ રોજિંદી જીવનમાં ઉપયોગી બનતી વસ્તુઓના નિર્માણ તરફ પ્રેરિત થાય તે હતો. પ્રદર્શનમાં બાળ વૈજ્ઞાનિકોએ વિજ્ઞાનના જુદા જુદા સિદ્ધાંતો પર આધારિત કુલ ૨૫ કૃતિઓ રજૂ કરી હતી. દરેક કૃતિની પાછળનો સિદ્ધાંત, તેની અંદરની રચના, નિર્માણ પ્રક્રિયા તથા તેનો ઉપયોગ કેવી રીતે થાય તેની વિગત વિદ્યાર્થીઓએ પ્રદર્શન જોવા આવેલા મહેમાનો અને દર્શકોને ઉત્સાહપૂર્વક સમજાવી હતી.
આ પ્રદર્શનના દાતા તરીકે હરદેવભાઈ કાનગડ (વિનય ઇન્ટરનેશનલ સ્કૂલ) તરફથી યોગદાન મળ્યું હતું, કાર્યક્રમમાં તાલુકા વિકાસ અધિકારી પારસભાઈ સાવલિયા, મોડેલ સ્કૂલના આચાર્ય બી.એન. વિડજા, તાલુકા પંચાયત ઉપપ્રમુખ સીતાબેન લાવડીયા, સભ્ય લખમણભાઈ નાટડા, ટીપીઈઓ માળીયા શ્રીમતી શર્મિલાબેન હુંમલ, આસી. ડીપીસી મોરબી પ્રવિણભાઈ ભોરણીયા, સરપંચ સુરેન્દ્રભાઈ ડાંગર, ટ્રસ્ટી અમુભાઈ ડાંગર, તેમજ બેંક ઓફ બરોડાના બ્રાન્ચ મેનેજર બેન્ક ઓફ બરોડા વગેરે ઉપસ્થિત રહ્યા હતા, સમગ્ર પ્રદર્શનને સફળ બનાવવા બીઆરસી કો.ઓર્ડીનેટર મહેન્દ્રભાઈ સોલંકી તેમજ તમામ સીઆરસી કો.ઓર્ડીનેટર અને મોડેલ સ્કૂલના તમામ સ્ટાફે ખુબજ જહેમત ઉઠાવી હતી.
