મોરબી બાયપાસ પાસે ગેસની પાઇપ લાઇન લીકેજ થતા આગ ભભૂકી

મોરબી બાયપાસ પાસે આજે વહેલી સવારે ગેસની પાઇપ લાઇન લીકેજ થયા બાદ આગ લાગતાં વાહનચાલકોમાં ગભરાટ ફેલાયો હતો. કોર્પોરેશનની ટીમોએ ગેસ પૂરવઠો બંધ કરી ફાયર ની ટીમે આગને કાબૂમાં લીધી હતી.

મળતી માહિતી અનુસાર, મોરબી બાયપાસ પાસે ગેસની પાઇપ લાઇન લીકેજ થઈ હતી. ત્યારે જોત જોતામાં જ આ લીકેજમાં આગ લાગી હતી. જોકે સવારનો સમય હોવાથી આ વિસ્તારમાં ટ્રાફિક ઓછો હોવાના કારણે મોટી દુર્ઘટના ટળી હતી. તેમજ મોરબી ફાયરની ટીમે ઘટનાસ્થળે પહોંચીને આગને કાબૂમાં લીધી હતી. જયારે બનાવને પગલે ગુજરાત ગેસના અધિકારીઓ પણ દોડતા થયા હતા અને હાલમાં પાઇપલાઇન રીપેરીંગ ની કામગીરી હાથ ધરવામાં આવી છે.