વિશ્વ મહિલા દિવસ પખવાડિયાની ઉજવણી નિમિતે ઇન્ડિયા ગ્રુપ અને પી.જી. પટેલ કોમર્સ કોલેજના સંયુક્ત ઉપક્રમે “The Kerala Story 2” ફિલ્મનો વિશેષ શો દર્શાવી યુવતીઓમાં જાગૃતિ લાવવાનો હકારાત્મક પ્રયાસ કર્યો
મોરબી : યુવાનોને સાચી દિશા અને યોગ્ય પ્લેટફોર્મ પૂરું પાડવામાં આવે તો એ સમાજ અને દેશમાં વિકાસ અને સુખ સમૃદ્ધિ લાવી શકે એવું એમનું યૌવનનું શક્તિ સામર્થ્ય હોય છે. તેમાંય શક્તિનો અવતાર ગણાતી નારી પોતાના સ્વમાન અને શક્તિથી પુરુષો કરતા પણ તમામ ક્ષેત્રે ટોચના સ્થાને છે. યૌવનની ઉબંરનો એવો ગંભીર વણાંક હોય કે કોલેજીયન કે શિક્ષિત યુવતીઓ અવસ્થાના આવેશમાં રાહ ભટકી જાય છે અને ગેરમાર્ગ દોરાઈ જતી હોય છે. ત્યારે યુવતીઓ આવા આવેગો પર કાબુ મેળવી જીવનની સાચી મંઝિલ તરફ આગળ વધે તેવી જાગૃતિલક્ષી “The Kerala Story 2” ફિલ્મ રિલીઝ થઈ છે. આથી મોરબીમાં સમાજ જાગૃતિથી દેશભાવના અખડીત રાખવા સતત સક્રિય રહેતા યંગ ઇન્ડિયા ગ્રુપ અને પી.જી. પટેલ કોમર્સ કોલેજના સંયુક્ત ઉપક્રમે યુવતીઓને “The Kerala Story 2” ફિલ્મનો વિશેષ શો દર્શાવી યુવતીઓમાં જાગૃતિ લાવવાનો હકારાત્મક પ્રયાસ કરવાની પ્રેરણાદાયી પહેલ કરવામાં આવી હતી.
આંતરરાષ્ટ્રીય મહિલા દિવસ પખવાડિયાની ઉજવણીના ભાગરૂપે યુવતીઓમાં જાગૃતિ અને સચેતનતા વધે તેવા હેતુથી યંગ ઇન્ડિયા ગ્રુપ અને પી.જી. પટેલ કોમર્સ કોલેજ, મોરબીના સંયુક્ત ઉપક્રમે એક અર્થપૂર્ણ કાર્યક્રમનું આયોજન કરવામાં આવ્યું હતું. આ પ્રસંગે કોલેજમાં અભ્યાસ કરતી દીકરીઓ માટે ચર્ચાસ્પદ ફિલ્મ **“The Kerala Story 2”**નું વિશેષ પ્રદર્શન યોજાયું હતું. આ કાર્યક્રમમાં પી.જી. પટેલ કોમર્સ કોલેજના પ્રિન્સિપાલ રવિન્દ્રભાઈ ભટ્ટ પણ ઉપસ્થિત રહી કાર્યક્રમમાં જોડાયા હતા અને આવા જાગૃતિમૂલક કાર્યક્રમો યુવતીઓ માટે સમયોચિત અને મહત્વપૂર્ણ હોવાનું જણાવ્યું હતું.
સમાજમાં દીકરીઓ અને યુવતીઓ સુરક્ષિત, સજાગ અને સશક્ત બને તે આજના સમયની મહત્વપૂર્ણ જરૂરિયાત છે. આ વિચારને કેન્દ્રમાં રાખીને આયોજિત આ કાર્યક્રમનો મુખ્ય હેતુ યુવતીઓને જીવનમાં યોગ્ય નિર્ણય લેવાની સમજ આપવાનો, ગેરમાર્ગે દોરતી પરિસ્થિતિઓ સામે સચેત રહેવાની પ્રેરણા આપવાનો અને પોતાની સુરક્ષા અંગે વધુ જાગૃત બનાવવાનો હતો.
આ ફિલ્મ માત્ર મનોરંજન પૂરતી સીમિત નથી, પરંતુ આજના સમયમાં સમાજ સામે ઊભા થતા કેટલાક સંવેદનશીલ પ્રશ્નો અને તેની પાછળની વાસ્તવિકતાઓ વિશે વિચારવા પ્રેરણા આપે છે. ફિલ્મના માધ્યમથી યુવતીઓને જીવનમાં સાવચેત રહેવાની, યોગ્ય માર્ગ પસંદ કરવાની અને પોતાના ભવિષ્ય અંગે સચેત વિચાર કરવાની પ્રેરણા મળે તે હેતુથી આ આયોજન કરવામાં આવ્યું હતું.
આ પ્રસંગે **ડૉ. દેવેન રબારી (સ્થાપક – યંગ ઇન્ડિયા ગ્રુપ)**એ જણાવ્યું હતું કે દીકરીઓને માત્ર રક્ષણ આપવું પૂરતું નથી, પરંતુ તેમને જાગૃત, આત્મવિશ્વાસી અને સશક્ત બનાવવું પણ એટલું જ મહત્વપૂર્ણ છે. જાગૃતિ એ જ સુરક્ષાનું સૌથી શક્તિશાળી સાધન છે. જ્યારે યુવતીઓ સચેત અને સજાગ બને છે ત્યારે સમગ્ર સમાજ વધુ સુરક્ષિત અને સંસ્કારી બને છે.
વધુમાં તેમણે જણાવ્યું હતું કે આવા કાર્યક્રમો દ્વારા યુવતીઓમાં આત્મવિશ્વાસ વધે, સાચું અને ખોટું ઓળખવાની સમજ વિકસે અને તેઓ પોતાના જીવનના નિર્ણયો વધુ સમજદારીપૂર્વક લઈ શકે. મહિલા દિવસ માત્ર ઉજવણી પૂરતો ન રહી સમાજમાં સુરક્ષા, સન્માન અને સશક્તિકરણનો સંદેશ ફેલાવવાનો દિવસ બને તે ભાવના સાથે આ કાર્યક્રમનું આયોજન કરવામાં આવ્યું હતું.
