મોરબીના લગધીરપુર રોડ પર આવેલી સિરામિક ફેક્ટરીના લેબર ક્વાર્ટરમાં મધ્યપ્રદેશથી આવેલ લિવ-ઇન રિલેશનમાં રહેતા યુગલ વચ્ચે થયેલા ઝઘડામાં યુવક દ્વારા યુવતીની હત્યા કરવામાં આવી હતી. બાદમાં પોલીસ કસ્ટડીમાં યુવકને હાર્ટએટેક આવતા તેનું પણ મૃત્યુ નીપજ્યું હતું. બંનેના મોતથી પ્રેમ કહાનીનો દુઃખદ અંત આવ્યો છે.
મોરબીના લગધીરપુર રોડ પર સ્થિત લેક્સેસ સિરામિક ફેક્ટરીના લેબર ક્વાર્ટરમાં ચોંકાવનારી ઘટના બની છે. ત્રણ મહિના પહેલા મધ્યપ્રદેશથી આવી મોરબીમાં મજૂરીનું કામ કરતા અને લિવ-ઇન રિલેશનમાં રહેતા નરેન્દ્રસિંહ કમલસિંહ ધ્રુવેલ ઉવ.૨૫ અને પુષ્પાબેન ગંભીરસિંહ મરાવી ઉવ.૨૦ વચ્ચે ઝઘડો થયો હતો. ઝઘડો ઉગ્ર બનતા નરેન્દ્રસિંહે પટ્ટા અને લાકડીથી પુષ્પાબેનને માર મારતા તેનું મોત થયું હતું. આ બનાવ અંગે જનરક્ષક ૧૧૨ને લેબર રૂમમાં યુવતીની લાશ હોવાનો કોલ મળતા તાલુકા પોલીસ તાત્કાલિક સ્થળ પર પહોંચી હતી. પુષ્પાબેનના શરીર પર અનેક ઇજાના નિશાન જોવા મળતા પોલીસે શરૂઆતથી જ હત્યાનો મામલો ગણાવી તપાસ હાથ ધરી હતી. શરૂઆતમાં આરોપી નરેન્દ્રસિંહ ગલ્લાતલ્લા કરતો હતો, પરંતુ પોલીસ પૂછપરછ સઘન બનતા તેણે સાંજે થયેલા ઝઘડામાં પુષ્પાને માર મારીને મારી નાખ્યાનો સ્વીકાર કર્યો હતો.
તાલુકા પોલીસે વિધિવત ગુન્હો નોંધી આરોપી નરેન્દ્રસિંહને કસ્ટડીમાં લઈ લોકઅપમાં રાખ્યો હતો. જોકે વહેલી સવારે નરેન્દ્રસિંહને અચાનક છાતીમાં દુઃખાવો ઉપડતા પોલીસે તેને તાત્કાલિક હોસ્પિટલ ખસેડ્યો હતો, જ્યાં ખસેડતી વખતે જ રસ્તામાં તેનું મોત થયું હતું. આ ચકચારી ઘટનાને લઈને ડીવાયએસપી વી.બી.દલવાડીએ પત્રકાર પરિષદ યોજી જણાવ્યું હતું કે યુવક-યુવતી પરિવારની મંજૂરીથી મોરબી આવ્યા હતા અને સાથે રહી મજૂરીનું કામ કરતા હતા. પીએમ રિપોર્ટ મુજબ પુષ્પાબેનને પટ્ટા અને લાકડીનો માર મારવાથી થયેલ ગંભીર ઇજાને કારણે મોત થયું, જ્યારે પોલીસ કસ્ટડીમાં મૃત્યુ પામેલ નરેન્દ્રસિંહનું મૃત્યુ હાર્ટએટેકને કારણે થયેલું હોવાનું મેડિકલ રિપોર્ટમાં સામે આવ્યું છે.
