મોરબીના કંડલા બાયપાસ હાઇવે ઉપર આરટીઓ બ્રિજ નજીક ધરમપુર ગામના પાટીયા પાસે બાઈક ઉપર સવાર બે પિતરાઈ ભાઈને સામેથી આવતા માતેલા સાંઢ જેવા કાળમુખા ડમ્પરે હડફેટે લઇ બંને પિતરાઈ ભાઈને ગંભીર રીતે ઈજાગ્રસ્ત કર્યા હતા. આ સાથે અકસ્માત સર્જી ડમ્પર ચાલક પોતાનું ડમ્પર લઈને નાસી ગયો હતો.
મળતી માહિતી અનુસાર જામનગર જીલ્લાના જસાપર ગામ રહેતા હસમુખભાઇ દામજીભાઇ કાનાણી ઉવ.૪૬ કે જેઓ અપરિણીત હોય અને નોકરી કે છૂટક મજૂરીના કામની શોધમાં મોરબી સ્થિત રહેતા તેના ફૈબાને ત્યાં આવેલ હોય ત્યારે ગત તા.૧૧/૦૫ના રોજ હસમુખભાઈ અને તેમના ફૈબાનો દીકરો દીપકભાઈ નાથાભાઈ અઘેરા હીરો ડિલક્સ બાઈક રજી.જીજે-૩૬-એકે-૪૭૦૩ લઈને મોરબી-કંડલા બાયપાસ હાઇવે ઉપર જતા હોય ત્યારે આરટીઓ બ્રિજ નજીક ધરમપુર ગામના પાટીયા ધરમપુરની હાઇવે ઉપરની કટ પાસે સામેથી પૂર ઝડપે આવતા ટાટા હાઇવા ડમ્પર રજી. જીજે-૩૬-વી-૩૯૭૪ના ચાલકે પોતાનું ડમ્પર બેદરકારીથી ચલાવી બાઈક સવાર બંને પિતરાઈ ભાઈઓને સાણેથી હડફેટે લઇ પોતાનું ડમ્પર લઈને સ્થળ ઉપરથી નાસી છૂટ્યો હતો. ત્યારે આ અકસ્માતમાં હસુભાઈને પગની પેનીમાં ગંભીર ઈજાઓ પહોંચી હતી તથા બાઇકમાં પાછળ બેસેલ દીપકભાઈને સામાન્ય મૂંઢ ઈજાઓ થઇ હતી ત્યારે અકસ્માતના બનાવ અંગે હસુભાઈ દ્વારા મોરબી તાલુકા પોલીસ મથકમાં ફરિયાદ નોંધાવતા પોલીસે આરોપી ડમ્પર ચાલક વિરુદ્ધ ગુનો નોંધી કાયદેસરની કાર્યવાહી હાથ ધરી છે.
