મોરબીના ગીડચ-પાનેલી રોડ પર પાણીના ટેન્કરે બુલેટ મોટરસાયકલને હડફેટે લેતા ગંભીર અકસ્માત સર્જાયો હતો. અકસ્માતમાં એક યુવકનું સ્થળ ઉપર જ મોત થયું જ્યારે બીજા યુવકનું સારવાર દરમ્યાન મોત નિપજ્યું હતું. ટેન્કર ચાલક અકસ્માત બાદ વાહન લઈને ફરાર થતા તાલુકા પોલીસે ગુનો નોંધી તપાસ શરૂ કરી છે.
મોરબી તાલુકાના ગીડચ ગામ નજીક પાનેલી તરફ જતા રસ્તા પર ગઈકાલ તા. ૩૦/૧૨/૨૦૨૫ના રોજ ગંભીર માર્ગ અકસ્માત સર્જાયો હતો. ગીડચ ગામના અનીલભાઈ પ્રેમજીભાઈ કુંવરિયા ઉવ.૨૫ તેમના મોટા ભાઈ મહેશભાઈ તથા મિત્ર ભાવેશભાઈ લાભુભાઈ ટીડાણી સાથે બુલેટ મોટરસાયકલ રજી.નં. જીજે-૩૬-એજી-૭૯૮૩ ઉપર મગફળી વેચાણ અર્થે મોરબી તરફ જઈ રહ્યા હતા. આ દરમિયાન બુલેટ બાઇક મિત્ર ભાવેશભાઈ ચલાવી રહ્યા હતા, ફરિયાદી અનીલભાઈ અને પાછળ મહેશભાઈ બેઠેલા હતા. ગીડચથી પાનેલી તરફ જતા રસ્તા પર અવાડા પાસેના વળાંક ઉપર સામેથી પાનેલી તળાવમાંથી પાણી ભરી આવતો ટેન્કર રજી.નં. જીજે-૧૦-એક્સ-૭૦૨૨ બેફામ ગતિએ આવી બુલેટને ધડાકાભેર હડફેટે લીધો હતો. અકસ્માતમાં ત્રણેય યુવકો રોડ પર પટકાયા હતા, જેમાં ભાવેશભાઈનું માથું ટેન્કરના ટાયર નીચે આવી જતા તેમનું સ્થળ પર જ મોત થયું હતું. જ્યારે ગંભીર રીતે ઈજાગ્રસ્ત મહેશભાઈને મોરબીની આયુષ હોસ્પિટલમાં સારવાર માટે ખસેડાયા હતા, જ્યાં સારવાર દરમ્યાન તેમનું પણ મોત નિપજ્યું હતું. અકસ્માત બાદ ટેન્કર ચાલક વાહન લઈને ફરાર થઈ ગયો હતો. ઘટનાની જાણ થતા પરિવારજનો તથા ગ્રામજનો ઘટના સ્થળે દોડી આવ્યા હતા અને ઇજાગ્રસ્ત ફરિયાદી અનીલભાઈને પ્રથમ મોરબી અને બાદમાં રાજકોટની સિનર્જી હોસ્પિટલ ખાતે સારવાર માટે ખસેડાયા છે, જ્યાં તેમની હાલત સ્થિર હોવાનું જાણવા મળ્યું છે. આ અકસ્માતના બનાવ અંગે ઇજાગ્રસ્ત અનીલભાઈ કુંવરિયાની ફરિયાદના આધારે તાલુકા પોલીસ દ્વારા આરોપી ટેન્કર ચાલક સામે ગુનો નોંધી કાયદેસરની કાર્યવાહી હાથ ધરી છે.
