વાંકાનેર સિટી પોલીસ સ્ટેશન વિસ્તારમાં ગેર કાયદેસર પ્રવૃત્તિ કરનાર અને અગાઉ ઇંગ્લિશ દારૂના ગુન્હામાં પકડાયેલ ઈસમ વિરૂદ્ધ પાસા દરખાસ્ત તૈયાર કરી જિલ્લા મેજિસ્ટ્રેટને મોકલતા મંજૂર કરતા ઇસમને ચંદ્રપુર માર્કેટ યાર્ડ પાસેથી પકડી પાડ્યો હતો. ત્યારે ઈસમ નશામાં હોવાનું સામે આવતાં વાંકાનેર સિટી પોલીસ સ્ટેશન ખાતે ગુન્હો દાખલ કરી ઇસમને પાસા બજવણી કરી ભાવનગર મધ્યસ્થ જેલ ખાતે મોકલી આપવામાં આવ્યો છે.
મળતી માહિતી અનુસાર, પોલીસ મહાનિરીક્ષક રાજકોટ વિભાગ અશોકકુમાર યાદવ, પોલીસ અધિક્ષક રાહુલ ત્રિપાઠી તરફથી મોરબી જીલ્લામાં ગેરકાયદેસર પ્રવૃતિ કરતા ઇસમો ઉપર કડક કાર્યવાહી કરવા સુચના આપી હતી. જેને લઇને વી.બી.દલવાડી I/C નાયબ પોલીસ અધિક્ષક વાંકાનેર વિભાગના માર્ગદર્શન હેઠળ વાંકાનેર સીટી પોલીસ સ્ટેશન વિસ્તારમા ગેરકાયદેસર પ્રવૃતિ કરતા અને અગાઉ ઇંગ્લીશ દારૂના ગુન્હાઓમાં પકડાયેલ ઇસમ અમીર ઉર્ફે કાળુ અબ્દુલભાઇ મોગલ/પઠાણ વિરૂધ્ધ પાસા વોરંટ જીલ્લા મેજિસ્ટ્રેટ મોરબીના નં.જે/એમઅજી/પાસા-કેસ નં.૦૬/૨૦૨૫ તા.૨૦/૦૧/૨૦૨૫ થી પાસા વોરંટ મંજુર કરવામાં આવ્યું હતું. જેના આધારે સર્વેલન્સ સ્ટાફ વાંકાનેર ચંન્દ્રપુર વિસ્તારમા પેટ્રોલીંગ હતા. તે દરમ્યાન સંયુક્તમા ખાનગી બાતમીને આધારે ઈસમ ચંદ્રપુર માર્કેટ યાર્ડ પાસેથી મળી આવ્યો હતો. જે ઈસમ કેફી પ્રવાહી પીધેલ હતો. તેથી ઈસમ વિરૂધ્ધ વાંકાનેર સીટી પોલીસ સ્ટેશન સી-પાર્ટ ગુ.ર.ન.૪૬૨/૨૦૨૫ પ્રોહી કલમ ૬૬(૧)(બી) મુજબ ગુન્હો દાખલ કરાવી ઇસમને પાસા વોરંટની બજવણી માટે વાંકાનેર તાલુકા પોલીસ સ્ટેશન ખાતે બજવણી કરી મધ્યસ્થ જેલ ભાવનગર ખાતે મોકલી આપવામાં આવ્યો છે.
જેમાં પોલીસ ઇન્સ્પેકટર એચ.એ.જાડેજા, સર્વેલન્સ ટીમના પોલીસ હેડ કોન્સ્ટેબલ યશપાલસિંહ ભવાનસિંહ પરમાર, મુકેશભાઇ પ્રેમજીભાઇ ચાવડા, વિશ્વરાજસિંહ પ્રવીણસિંહ ઝાલા, વિરેન્દ્રસિંહ હરભમજી ઝાલા, પોલીસ કોન્સ્ટેબલ હિતેન્દ્રસિંહ મનુભા ઝાલા, દર્શીતભાઇ ગીરીશભાઇ વ્યાસ, વિપુલભાઇ કાળુભાઇ પરમાર, ભરતભાઇ વાલજીભાઇ દલસાણીયા દ્વારા કામગીરી કરવામાં આવી હતી.
