મોરબીના ટિબડીના પાટિયા નજીક કાર અને ટ્રક વચ્ચે ગોઝારો અકસ્માત :પાંચ ના મોતથી અરેરાટી
મોરબી: મોરબી તાલુકાના ટિબડીના પાટિયા નજીક કાર અને ટ્રક વચ્ચે ગોઝારો અકસ્માત સર્જાયો હતો. આ અકસ્માતમાં પાંચ વ્યક્તિના મોત નિપજતા મોરબી પંથકમાં અરેરાટી વ્યાપી ગઈ છે. આ બનાવને પગલે મોરબી તાલુકા પોલીસ સ્ટાફ તાબડતોબ ઘટના સ્થળે દોડી ગયો હતો.
આ ગોઝારા બનાવની જાણવા મળતી વિગત અનુસાર મોરબીટિબડીના પાટિયા નજીક સ્વીફ્ટ કાર GJ 36 F 1059 અને ટ્રક વચ્ચે ધડાકાભેર થયેલ અકસ્માતને પગલે ટિબડી રોડ રક્તરંજીત બન્યો છે. મોરબી પંથકમાં ટ્રાન્સપોર્ટના ધંધા સાથે સંકળાયેલા પાંચક યુવાનો કાર લઈ પોતાની ભરતનગર ઓફિસેથી જઇ રહ્યા હતા તે દરમિયાન રોડ પર બાઈક ચાલકને સ્વીફ્ટ કાર ચાલકે બચાવવા જતા ગમખ્વાર અકસ્માત સર્જાયો હતો.
કાર અને ટ્રક વચ્ચેના અકસ્માતમાં પાંચ લોકોના દબાઈ જવાથી કમકમાટીભર્યા મોત નિપજ્યા છે. કારમાં સવાર આનંદ શેખાવાત(ઉ.વ 26), તારાચંદ (ઉ.વ.30),બિરજુભાઈ (ઉ.વ.22) પવન મિસ્ત્રી(ઉ.વ. 28) સહિત પાંચના મોત નિપજ્યા હોવાનું સામે આવ્યું છે.આ ઘટનાની જાણ થતાં મોરબી એસપી એસ આર ઓડેદરા, ડીવાયએસપી રાધિકા ભારાઈ, પીઆઇ એમ આર ગોઢાણીયા, મોરબી તાલુકા પોલીસ ટિમના પીઆઇ એમ આર ગોઢાણીયા સહિતનો પોલીસ કાફલો ઘટના સ્થળે દોડી ગયો હતો. અને મૃતદેહને પીએમ અર્થે ખસેડી રોડ પરનો ટ્રાફિક હળવો કરવા કામગીરી હાથ ધરાઈ હતી.
