હળવદમાં માર્ગ અકસ્માતની વધુ એક ઘટના સામે આવી છે. જેમાં પુરપાટ ઝડપે જતી કારે ધ્રાંગધ્રા-હળવદ હાઇવે પર રોડ ક્રોસ કરતા એક યુવકને હડફેટે લેતા યુવકનું ઘટના સ્થળે જ મોત નિપજ્યું હતું. જ્યારે કાર ચાલક અકસ્માત સર્જી કાર લઈ ફરાર થયો છે. જે સમગ્ર મામલે મૃતકનાં ભત્રીજા દ્વારા હળવદ પોલીસ સ્ટેશનમાં ફરિયાદ દાખલ કરાવી છે.
મળતી માહિતી અનુસાર, હળવદના કોયબા ગામે રહેતા સાગરકુમાર બાબુભાઇ બાલાસણીયાનાં કાકા પ્રવિણભાઇ કુકાભાઇ ગત તા.૧૯/૦૭/૨૦૨૩નાં રાત્રીના સમયે ધ્રાંગધ્રા-હળવદ હાઇવે રોડ પરથી પસાર થઈ રહ્યા હતા. ત્યારે GJ-36-V-2527 નંબરની સ્વીફ્ટ મોડેલની ગાડીનાં ચાલકે પોતાની કાર પુરપાટ ઝડપે ચલાવી આવી આશાપુરા હોટેલ સામે પ્રવિણભાઇ કુકાભાઇ ચાલીને રોડ ક્રોસ કરતા હોય તેઓને હડફેટે લઇ માથામાં તથા પગમાં તથા શરીરે ગંભીર ઇજાઓ પહોચતા તેનું મોત નિપજ્યું હતું. જયારે આરોપી પોતાની ગાડી લઇ નાશી જતા સમગ્ર મામલે હળવદ પોલીસ સ્ટેશનમાં ફરિયાદ નોંધાઈ છે.
