રાજકોટ રેન્જ આઈ.જી. અશોકકુમાર યાદવ, મોરબી જીલ્લા એસ.પી. મુકેશકુમાર પટેલના માર્ગદર્શન હેઠળ હળવદ પોલીસ દ્વારા હળવદ તાલુકામાં ખોટી લૂંટની માહિતી આપનાર ઈસમો વિરુદ્ધ કાયદેસરની કાર્યવાહી હાથ ધરાઈ છે.
મળતી માહિતી અનુસાર, હળવદ તાલુકાના દેવળીયા ગામ પાસે ફાઉન્ટન હોટલ પાસે લુટનો બનાવ બનેલ છે તેવી માહિતી જન રક્ષક ૧૧૨ ને મળતા કોલરને હળવદ પોલીસ સ્ટેશન ખાતે લાવવામાં આવ્યો હતો. અને કોલરની યુક્તિ પ્રયુક્તિથી સઘન પુછપરછ કરતા તેણે જણાવ્યું હતું કે, પોતાની સાથે કોઇ લુટનો બનાવ બનેલ નથી. પરંતુ તેના ટ્રકના કાચમા અજાણ્યા ઇસમોએ પથ્થરના ઘા મારી નુકશાની કરી છે અને પોતાને મુંઢ માર મારેલ છે. જેથી ટ્રકના માલિકને ફોન કરતા ટ્રકના માલિકોએ માળીયાના ટ્રાન્સપોર્ટરો મારફતે આ કોલરને ફોનમાં કહ્યું કે, તુ ૧૧૨ નંબર ઉપર ફોન કરીને કહી દે કે મારી સાથે રૂ.૨,૦૦,૦૦૦/- ની લુટ થઇ છે અને મને માર માર્યો છે. જેથી ૧૧૨ મા આ કોલરે પોલીસ મદદ માટે ફોન કર્યો હતો અને જણાવ્યું હતું કે, કોઇ અજાણ્યા ઇસમોએ મારી ગાડીમા નુકશાન કરી મારી પાસે રૂપીયા-૨,૦૦,૦૦૦/- ની લુટ કરી છે અને મને માર માર્યો છે. તેવી ખોટી માહીતી આપેલ હોવાથી કોલર સુરેશભાઇ સરજુભાઇ આહિર તેમજ તેની સાથે બજરંગ ટ્રાન્સપોર્ટ વાળા રાજાભાઇ ઉર્ફે જયેશભાઇ અશોકભાઇ અગ્રવાલ, નીલેશભાઇ અગ્રવાલ, ઇરફાન ટ્રાન્સપોર્ટ વાળા હૈદરભાઇ મોવર તથા અબ્દુલભાઇ ભટ્ટી વિરુધ્ધ ગુનો દાખલ કરવામાં આવ્યો છે.
