માળીયા(મી) તાલુકાના મોટા દહીસરા ગામે થયેલા હત્યાના પ્રયાસના ગુનામાં ફરાર થયેલા આરોપીને માળીયા(મી) પોલીસે ઝડપી કામગીરી કરીને ગણતરીના કલાકોમાં જ પકડી પાડ્યો હતો. ટેકનિકલ અને હ્યુમન સોર્સના આધારે આરોપીને દબોચી લઈ પોલીસે કાયદેસરની કાર્યવાહી હાથ ધરી છે.
માળીયા(મી) પોલીસ સ્ટેશનમાં નોંધાયેલ હત્યાના પ્રયાસના કેસની વિગતો મુજબ, મોટા દહીસરા ગામે બનેલા હત્યાના પ્રયાસના બનાવમાં આરોપી કીશોરભાઈ દેવદાનભાઈ લોખીલ ઉવ.૩૭ વાળો ગુનો આચરીને ફરાર થઈ ગયો હતો. આ બનાવને ગંભીરતાથી લઈ માળીયા(મી) પોલીસ મથકના પીઆઈએ આરોપીને ઝડપવા માટે અલગ-અલગ ટીમો રચી હતી. પોલીસ દ્વારા ટેકનિકલ સર્વેલન્સ તેમજ હ્યુમન ઈન્ટેલિજન્સના આધારે આરોપીની ચોક્કસ બાતમી મળી કે, ફરાર આરોપી મોટા દહીસરાથી નાનાભેલા જવાના માર્ગ પર આવેલા વાળામા છુપાયો છે. આ માહિતીના આધારે પોલીસની સર્વેલન્સ ટીમે સ્થળને કોર્ડન કરીને આરોપીને ઝડપી પાડ્યો હતો. આ સાથે પોલીસ દ્વારા આરોપીની ધરપકડ કરી આગળની કાયદેસરની કાર્યવાહી હાથ ધરવામાં આવી છે.
