ટંકારા સ્થાનકવાસી જૈન સંઘના આંગણે આધ્યાત્મિકતા અને સત્સંગનો અનોખો માહોલ સર્જાયો છે. જૈન સંઘ દ્વારા સંતવાણી અને ધર્મપ્રવચનોની શ્રેણીનું આયોજન કરવામાં આવ્યું છે, જેમાં સમગ્ર ટંકારાના નગરજનોને ઉપસ્થિત રહી આધ્યાત્મિક જ્ઞાન અને સત્સંગનો લાભ લેવા આમંત્રણ પાઠવવામાં આવ્યું છે.
સંઘ દ્વારા જાહેર કરાયેલા કાર્યક્રમ મુજબ, દરરોજ બપોરે 3:00 થી 4:00 વાગ્યા દરમિયાન વ્યાખ્યાનનું આયોજન કરવામાં આવશે. આ દરમિયાન સંતો દ્વારા ધર્મ, સંસ્કાર, જીવનમૂલ્યો અને આધ્યાત્મિક વિકાસ અંગે માર્ગદર્શન આપવામાં આવશે. આ ઉપરાંત દરરોજ રાત્રે 9:00 વાગ્યે વિશેષ પ્રવચન યોજાશે, જેમાં શ્રદ્ધાળુઓને ધર્મચિંતન, સત્સંગ અને આધ્યાત્મિક પ્રેરણાનો લાભ મળશે. સંતવાણીના આ કાર્યક્રમોને લઈને જૈન સમાજ સહિત નગરજનોમાં ઉત્સાહનો માહોલ જોવા મળી રહ્યો છે. ટંકારા સ્થાનકવાસી જૈન સંઘ દ્વારા સમગ્ર ટંકારાવાસીઓને સંત દર્શન, પ્રવચન અને સત્સંગનો લાભ લેવા અપીલ કરવામાં આવી છે. સંઘના આગેવાનોના જણાવ્યા મુજબ આ કાર્યક્રમોનો મુખ્ય હેતુ સમાજમાં આધ્યાત્મિક જાગૃતિ, નૈતિક મૂલ્યો અને ધાર્મિક ભાવનાને વધુ મજબૂત બનાવવાનો છે. સંતોના પાવન સાનિધ્યમાં યોજાનારા આ કાર્યક્રમો ટંકારાની ધાર્મિક અને સાંસ્કૃતિક પરંપરાને વધુ સમૃદ્ધ બનાવશે તેવી આશા વ્યક્ત કરવામાં આવી રહી છે.
