રાજ્ય માહિતી કમિશનરના અધ્યક્ષસ્થાને યોજાયેલી બેઠકમાં જીલ્લા વહીવટી તંત્રના સંકલન અધિકારીઓ વર્ચ્યુઅલી જોડાયા.
મોરબી: ગુજરાત માહિતી આયોગ, ગાંધીનગરના અધ્યક્ષસ્થાને ‘આરટીઆઇ વિક સેલિબ્રેશન’ અંતર્ગત તા. ૧૨/૧૦/૨૦૨૬ ના રોજ “સંવાદ-માહિતીનો અધિકાર અધિનિયમ, ૨૦૦૫ નું અમલીકરણ અને જવાબદારીનું સુદ્રઢીકરણ” વિષયક વિડિયો કોન્ફરન્સ બેઠકનું આયોજન કરવામાં આવ્યું હતું. મોરબી જીલ્લા કલેક્ટર કચેરીના સભાખંડ ખાતે યોજાયેલી આ મહત્વપૂર્ણ બેઠકમાં મોરબી જીલ્લાના સંબંધિત સંકલન અધિકારીઓ વર્ચ્યુઅલી ઉપસ્થિત રહ્યા હતા.
રાજ્ય માહિતી કમિશનરની ઉપસ્થિતિમાં યોજાયેલા આ પરિસંવાદ દરમિયાન માહિતીનો અધિકાર અધિનિયમ-૨૦૦૫ (આરટીઆઇ એક્ટ)ના કાયદાકીય જોગવાઈઓનું સુચારુ અમલીકરણ કરવા, જાહેર માહિતી અધિકારીઓ અને પ્રથમ અપીલ સત્તાધિકારીઓની જવાબદારીઓનું સુદ્રઢીકરણ કરવા તેમજ અરજદારોને સમયસર અને પારદર્શક માહિતી પૂરી પાડવા અંગે વ્યાપક માર્ગદર્શન પૂરું પાડવામાં આવ્યું હતું. મોરબી જીલ્લા વહીવટી તંત્રના અધિકારીઓએ વી.સી.ના માધ્યમથી જોડાઈને આરટીઆઇ અંતર્ગતની કામગીરીની સમીક્ષા કરી કાયદાના અસરકારક પાલન અંગેની વિગતો મેળવી હતી.
