પીડિતાના ભાઈની ફરિયાદ પરથી અજાણ્યા નરાધમ સામે માળીયા પોલીસે ગુનો નોંધી તપાસ હાથ ધરી
માળીયામાં એક મનોવિકલાંગ પીડિતા ઉપર અજાણ્યા નરાધમે દુષ્કર્મ ગુજારીને તેણીને ગર્ભવતી કરી દીધાનો મામલો બહાર આવતા આ ધુણાસ્પદ ઘટનાથી સમગ્ર સભ્ય સમાજનું માથું શરમથી ઝૂકી ગયું છે. આ બનાવ અંગે પીડિતાના ભાઈએ નરાધમ સામે ફરિયાદ નોંધાવતા માળીયા પોલીસે તેની સામે ગુનો નોંધીને વધુ તપાસ હાથ ધરી છે. આ ધૃણાસ્પદ બનાવથી સમગ્ર સમાજમાં આરોપી ઉપર ફિટકારની લાગણી વરસી છે.
આ બનાવની માળીયા (મી.) પોલીસ સ્ટેશનેથી પ્રાપ્ત થતી વિગતો મુજબ માળીયાના એક ગ્રામ્ય વિસ્તારમાં રહેતી માનસીક રીતે અસંતુલીત પીડિતાને અજાણ્યા શખ્સે હવસનો શિકાર બનાવી હતી અને આ પીડિતાની નબળી માનસિક સ્થિતિનો લાભ લઈને અજાણ્યા શખ્સે આ બળજબરીથી અવારનવાર તેની સાથે શારીરીક સબંધ બાંધી તેની સાથે દુષ્કર્મ આચરી ફરિયાદીની બહેન ને સાડા પાચ-છ મહિનાનો ગર્ભ રાખી દીધો હતો. આ બનાવ પહેલા સાડા પાચ છ મહિના અગાઉનો છે.
પણ ફરિયાદ મોડી થવા અંગે માળીયા પોલીસે જણાવ્યું હતું કે ફરીયાદીની બહેન માનસીક રીતે અસતુલીત હોય અને આ બાબતે પુછતા તે કાઈ જણાવતી ન હોય અને સમાજમા આબરૂ જવાની બીકે ફરીયાદ કરવી કે નહી તે બાબતે અસમંજમાં હતા. જેથી, આજદિન સુધી ફરીયાદ કરવા આવેલ ન હતા પરંતુ ગામના વડીલ અને સગા સબંધીઓએ બનેલ બનાવની ગંભીરતા સમજાવી ફરીયાદ કરવાનુ જણાવતા અંતે પીડિતાના ભાઈએ આ બનાવની ફરિયાદ નોંધાવી હતી. પોલીસે આ બનાવની ફરિયાદ નોંધીને આરોપીને ઝડપી લેવા તપાસ હાથ ધરી છે.
