માતાના મઢના દર્શનાર્થી પરિવારને અકસ્માત નડ્યો : મોરબીના યુવાનનું મોત

વરસામેડીથી ભીમાસર તરફ જવાના રસ્તે માતાના મઢના દર્શનાર્થીઓના વાહનને અકસ્માત નડતા મોરબીના એક યુવાનનું કમકમાટીભર્યું મોત નિપજ્યું છે.

મોરબીના વિજયનગરમાં રહેતા સોલંકી પરિવારના આઠ સભ્યો ટેમ્પો લઇને માતાના મઢ આશાપુરા દર્શન માટે ગયા હતા. દર્શન કરીને પરત ફરતી વેળાએ વરસામેડીથી ભીમાસર તરફ જવાના રસ્તે છોટાહાથી મીની ટેમ્પો નં.GJ36-V-0353 સામેથી આવતા ટ્રકના બચાવના પ્રયાસમાં રોડ પરથી પલ્ટી જતાં અકસ્માત સર્જાયો હતો. આ અકસ્માતની ઘટનામાં ટેમ્પો ચાલક જગદીશભાઈ મોહનભાઈ સોલંકી (રહે.વિજયનગર મોરબી)ને માથાના ભાગે ગંભીર ઈજાઓ પહોંચી હોવાથી ઘટના સ્થળે મોત નિપજ્યું હતું. જ્યારે ટેમ્પોમાં સવાર અન્ય 2 થી 3 સભ્યોને ઇજા પહોંચી હતી. જેથી ઇજાગ્રસ્તોને અંજાર હોસ્પિટલમાં ખસેડાયા છે. યુવાનના મોતથી સોલંકી પરિવારમાં ગમગીની વ્યાપી ગઈ છે.