શ્રી કૃષ્ણધામ વૃદ્ધાશ્રમ-અન્નક્ષેત્ર ખાતે વડીલોને ભોજન સાથે જીવનજરૂરિયાતની કિટ, શ્રીમદ્ ભગવદ્ ગીતા, તુલસીની માળા અને ધાર્મિક આસન અર્પણ
જરૂરિયાતમંદ વડીલોને શ્રવણયંત્ર, દવાઓ અને આરોગ્યલક્ષી સહિતની અન્ય જરૂરી સહાય પૂરી પાડવાનો પણ સેવાસંકલ્પ
બોટાદ : બોટાદ પોલીસ સબ ઇન્સપેક્ટર અર્ચના રાવલ દ્વારા તેમના સ્વર્ગવાસી પિતાશ્રી મુકેશભાઈ રાવલની જન્મતિથિ નિમિત્તે તેમની સ્મૃતિને સેવાકાર્ય સાથે જોડીને બોટાદ સ્થિત શ્રી કૃષ્ણધામ વૃદ્ધાશ્રમ-અન્નક્ષેત્ર ખાતે વડીલો માટે સેવાભાવી કાર્યક્રમનું આયોજન કરવામાં આવ્યું હતું. આ પ્રસંગે વૃદ્ધાશ્રમના વડીલોને ભોજન કરાવવા સાથે જીવનજરૂરિયાતની વિવિધ વસ્તુઓ અર્પણ કરી તેમના આશીર્વાદ મેળવવામાં આવ્યા હતા.
કાર્યક્રમ દરમિયાન વૃદ્ધાશ્રમમાં નિવાસ કરતા વડીલોને આત્મીયતાપૂર્વક ભોજન કરાવવામાં આવ્યું હતું. સાથે જ રોજિંદા જીવનમાં ઉપયોગી બને તેવી જીવનજરૂરિયાતની કિટનું વિતરણ કરવામાં આવ્યું હતું. વડીલોના જીવનમાં આધ્યાત્મિકતા અને સકારાત્મકતાનો ભાવ વધુ મજબૂત બને તે હેતુથી શ્રીમદ્ ભગવદ્ ગીતા, તુલસીની માળા અને ધાર્મિક આસન સહિતની વસ્તુઓ પણ સન્માનપૂર્વક ભેટ સ્વરૂપે અર્પણ કરવામાં આવી હતી.
આ સેવાકાર્યને માત્ર એક દિવસના ભોજન કે વસ્તુ વિતરણ પૂરતું સીમિત ન રાખતાં વડીલોની વ્યક્તિગત અને આરોગ્યલક્ષી જરૂરિયાતોને પણ ધ્યાનમાં લેવાનો પ્રયાસ કરવામાં આવ્યો હતો. ખાસ કરીને સાંભળવામાં તકલીફ અનુભવતા જરૂરિયાતમંદ વડીલોને શ્રવણયંત્ર (હિયરિંગ એઇડ), જરૂરિયાત મુજબની દવાઓ અને આરોગ્યલક્ષી સહાય તેમજ અન્ય જરૂરી વસ્તુઓ અને સહાય શક્યતા મુજબ પૂરી પાડવાનો સેવાભાવ વ્યક્ત કરવામાં આવ્યો હતો.
આ પ્રસંગે PSI અર્ચના રાવલે જણાવ્યું હતું કે, “મારા સ્વર્ગવાસી પિતાશ્રી મુકેશભાઈ રાવલની જન્મતિથિને સેવા સાથે જોડવાનો અમારો નમ્ર પ્રયાસ છે. પિતાશ્રીએ આપેલા સંસ્કારો અને જીવનમૂલ્યોને વડીલોની સેવા દ્વારા આગળ વધારવા અને તેમના આશીર્વાદ મેળવવા એ જ તેમના પ્રત્યેની સાચી શ્રદ્ધા છે. વડીલોના ચહેરા પર સ્મિત આવે અને તેમને જરૂરી સમયે ઉપયોગી સહાય મળી રહે, તેનાથી વધુ સાર્થક સ્મરણ બીજું શું હોઈ શકે?”
અર્ચના રાવલે વધુમાં જણાવ્યું હતું કે, “વૃદ્ધાવસ્થામાં દરેક વડીલની જરૂરિયાત અલગ હોય છે. કોઈને દવાની જરૂર હોય, કોઈને સાંભળવા માટે શ્રવણયંત્રની જરૂર હોય, તો કોઈને જીવનજરૂરિયાતની અન્ય વસ્તુઓ કે માત્ર લાગણી અને સહારાની જરૂર હોય છે. સમાજના દરેક વ્યક્તિએ પોતાની ક્ષમતા મુજબ વડીલોની જરૂરિયાત સમજી તેમની મદદ માટે આગળ આવવું જોઈએ. સેવા માત્ર આર્થિક સહાયનું નામ નથી; કોઈ વડીલને સમય આપવો, તેમની વાત સાંભળવી અને તેમને પોતાના હોવાનો અહેસાસ કરાવવો પણ મોટી સેવા છે.”
તેમણે ઉમેર્યું હતું કે સ્વર્ગવાસી પિતાશ્રી મુકેશભાઈ રાવલની સ્મૃતિ સાથે જોડાયેલો આ સેવાભાવ માત્ર એક પ્રસંગ પૂરતો મર્યાદિત ન રહે અને જરૂરિયાત મુજબ વડીલોને શક્ય સહાય મળતી રહે તેવો પ્રયાસ રહેશે.
કાર્યક્રમ દરમિયાન વડીલોના આશીર્વાદ મેળવી સમાજને પણ સંદેશ આપવામાં આવ્યો હતો કે પરિવારના જન્મદિવસ, જન્મતિથિ, પુણ્યતિથિ કે અન્ય સ્મૃતિપ્રસંગોને અન્નદાન, વૃદ્ધસેવા, આરોગ્ય સહાય અને જરૂરિયાતમંદોની મદદ જેવા સેવાકાર્યો સાથે જોડવામાં આવે તો આવા પ્રસંગો સામાજિક રીતે વધુ સાર્થક બની શકે છે.
ભારતીય સંસ્કૃતિમાં વડીલોની સેવા અને તેમના આશીર્વાદને વિશેષ સ્થાન આપવામાં આવ્યું છે. સ્વર્ગવાસી શ્રી મુકેશભાઈ રાવલની જન્મતિથિ નિમિત્તે યોજાયેલા આ સેવાકાર્ય દ્વારા પણ “સ્વજનની સ્મૃતિને સેવામાં પરિવર્તિત કરી તેમના સંસ્કારોને જીવંત રાખવા”નો પ્રેરણાત્મક સંદેશ આપવામાં આવ્યો હતો.
