મોરબીમાં થર્ટીફર્સ્ટને લઇને પોલીસ દ્વારા બાજ નજર રાખવામાં આવી હતી. સાથે જ પોલીસ દ્વારા સતત ચેકિંગ પણ હાથ ધરવામાં આવ્યું હતું. આવામાં બુટલેગરો દ્વારા પણ અવનવા હથકંડા અપનાવવામાં આવ્યા હોવા છતાં મોરબી જિલ્લા પોલીસ દ્વારા ત્રણ સ્થળોએથી પાંચ ઈસમોને વિદેશી દારૂના જથ્થા સાથે ઝડપી પાડવામાં આવ્યા હતા.
પ્રથમ દરોડામાં, મોરબી સીટી એ ડિવીઝન પોલીસની ટીમે ગઈકાલે બાતમીનાં આધારે મોરબીનાં વાવડીરોડ કબીર આશ્રમ પાસે રોડ ઉપરથી તરૂણભાઇ અરવિંદભાઇ આંકરીયા નામના શખ્સને ભારતીય બનાવટની પરપ્રાંતીય ઇંગલીશ દારૂની રોયલ ચેલેન્જ ફાઇનેસ્ટ પ્રીમીયમ વ્હીસ્કીની ૪ બોટલનાં રૂ.૨૦૮૦/- ના મુદામાલ સાથે પકડી પાડવામાં આવ્યો હતો અને તેના વિરુદ્ધ કાયદેસરણૈ કાર્યવાહી હાથ ધરવામાં આવી હતી.
બીજા દરોડામાં, મોરબી સીટી બી ડિવીઝન પોલીસની ટીમ દ્વારા બાતમીના આધારે નેશનલ હાઇવે જનકપુરી સોસાયટીની બાજુમા રેઈડ કરવામાં આવી હતી અને સ્થળ પરથી કૌશીકભાઇ રમણીકલાલ બજાણીયા નામના શખ્સને ગેર કાયદેસર પાસ પરમીટ કે આધાર વગર ભારતીય બનાવટની વિદેશી દારૂની મેકડોવેલ્સ નં.૦૧ ડીલક્ષ ઓરીજનલ વ્હીસ્કીની ૦૩ બોટલનાં રૂ.૧૧૨૫/-નાં મુદ્દામાલ સાથે પકડી પાડવામાં આવ્યો હતો.
ત્રીજા દરોડામાં, મોરબી તાલુકા પોલીસની ટીમ ગઈકાલે પેટ્રોલિંગમાં હોય ત્યારે તેઓને મળેલ બાતમીનાં આધારે મોરબી હળવદ રોડ હરિઓમ પાર્કના ગેઇટ પાસે આવેલ દુકાનો પાછળ ખરાબામાં રેઇડ કરવામાં આવતા સ્થળ પરથી મનિષભાઇ ઉર્ફે મુનો પ્રસાદભાઇ રાવલ બ્રાહમણ, રાજેશભાઇ ઉર્ફે રાજ દલસુખભાઇ અઘારા તથા બીપીનભાઇ હિંમતભાઇ મહેતા નામના શખ્સો ભારતીય બનાવટના પરપ્રાંતીય વિદેશી દારૂની ઓફીસર ચોઇસ વ્હીસ્કીની ૫ બોટલોનાં રૂ.૧૬૦૦/-ના મુદ્દામાલ સાથે મળી આવતા તેમની અટકાયત કરી આગળની કાર્યવાહી હાથ ધરવામાં આવી છે.
