મોરબી મામલતદાર કચેરીના નાયબ મામલતદાર જયદિપસિંહ ઝાલાએ સ્ટાર હેલ્થ એન્ડ એલાઈડ ઇન્શ્યોરન્સ કંપની પાસેથી મેડિકલ પોલિસી લીધી હતી, પરંતુ હીપ રીપ્લેસમેન્ટ સર્જરીના ખર્ચ માટેનો દાવો ઇન્શ્યોરન્સ કંપનીએ નકારતા તેમણે મોરબી ગ્રાહક સુરક્ષા મંડળના પ્રમુખ લાલજીભાઈ મહેતા દ્વારા ગ્રાહક અદાલતમાં કેસ દાખલ કર્યો હતો. ત્યારે ગ્રાહક અદાલતે વીમા કંપનીને રૂ. ૨.૬૩ લાખ અને રૂ. ૭ હજાર અન્ય ખર્ચ મળીને કુલ રૂ.૨.૭૦ લાખ કેસ દાખલ કર્યા તારીખથી ૬% વ્યાજ સાથે ચુકવવાનો આદેશ કર્યો છે.
આ કેસની ટુક વિગત મુજબ, નાયબ મામલતદાર જયદિપસિંહ એસ. ઝાલાએ મેડીકલ પોલીસી સ્ટાર હેલ્થ એન્ડ એલાઈડ ઈન્સ્યોરન્સ કંપની પાસેથી લીધેલ હતી. તેમને જમણા પગમાં હીપ રીપ્લેસમેન્ટની ફરિયાદ હોઈ અમદાવાદની આલોક હોસ્પીટલમાં સારવાર કરાવેલી. તેની સારવારનું બીલ રૂા. ૨,૬૩,૬૨૭/– આવેલ હતુ. આ બીલના તમામ કાગળો વિમા કંપનીને સમય મર્યાદામાં આપેલ. પોલીસીમાં એવુ જણાવેલ છે કે કુટુંબનો કોઈપણ સભ્ય બીમાર પડે તો વિમા કંપનીએ રકમ ચુકવવી. તેના બદલે ખુદ વીમા કંપની સ્ટાર હેલ્થ એન્ડ એલાઈડ ઈન્સ્યુરન્સ કંપનીએ ગ્રાહકને વિમો ચુકવવાની ના પાડેલ હતી. જેથી તેઓએ મોરબી શહેર/જીલ્લા ગ્રાહક સુરક્ષા મંડળના પ્રમુખ લાલજીભાઈ મહેતા દ્વારા ગ્રાહક અદાલતમાં જતાં મોરબી ગ્રાહક તકરાર નિવારણ અદાલતે વિમા કંપનીને જયદિપસિંહ ઝાલાને રૂા. ૨,૬૩,૬૨૭/– અને રૂા. ૭,૦૦૦/- ખર્ચના મળી કુલ રૂા. ૨,૭૦,૬૨૭/– તા. ૧૨-૦૮-૨૦૨૪ થી ૬ % ના વ્યાજ સાથે ચુકવવાનો આદેશ કરેલ છે.
આ સાથે ગ્રાહક સુરક્ષા મંડળ પ્રમુખ દ્વારા ગ્રાહકોને મહત્વની સૂચના આપતા જણાવ્યું છે કે ગ્રાહકે વિમો લેતા પહેલા તમામ વિગતો અને નિયમોની જાણકારી મેળવી લેવી જરૂરી છે. તેમજ કોઈપણ ગ્રાહકને અન્યાય થાય તો લાલજીભાઈ મહેતા મો.નં. ૯૮૨૫૭ ૯૦૪૧૨, બળવંતભાઈ ભટ્ટ મો.નં. ૯૩૨૭૪ ૯૯૧૮૫, રામ મહેતા મો.નં. ૯૯૦૪૭ ૯૮૦૪૮ નો સંપર્ક કરવા યાદીમાં જણાવવામાં આવ્યું છે.
