ટંકારા પોલીસે ગણતરીના દિવસોમાં આરોપી પકડી ચોરીમાં ગયેલ તમામ મુદ્દામાલ પરત મેળવ્યો.
ટંકારા તાલુકાના હરબટીયાળી ગામ નજીક કારખાનામાંથી થયેલી મોટર સાયકલ અને મોબાઇલ ચોરીના કેસમાં ટંકારા પોલીસને મોટી સફળતા મળી છે. સર્વેલન્સ ટીમને ખાનગીરાહે મળેલ બાતમીને આધારે પરપ્રાંતિય યુવકને ઝડપી પાડવામાં આવ્યો હતો. આરોપી પાસેથી ચોરાયેલ મુદામાલ મળી આવતા તેની કાયદેસરની ધરપકડ કરવામાં આવી છે.
ટંકારા પોલીસ ઇન્સ્પેક્ટર કે.એમ. છાસીયાના માર્ગદર્શન હેઠળ ટંકારા પોલીસ સ્ટેશન સર્વેલન્સ ટીમ પેટ્રોલિંગમાં હોય તે દરમિયાન શનિવારી બજારમાં એક હિન્દી ભાષી મજૂર નંબર પ્લેટ વગરનું મોટરસાયકલ લઈને મોબાઇલ વેચવા બજારમાં આવ્યો હોવાની ખાનગીરાહે મળેલ બાતમીને આધારે પોલીસ સ્ટાફે વોચ ગોઠવી તપાસ હાથ ધરી હતી. દરમ્યાન એક શંકાસ્પદ વ્યક્તિ નંબર પ્લેટ વિનાના મોટરસાયકલ સાથે મળી આવતા પોલીસે તેનું નામ-સરનામું તથા વાહન સંબંધિત આર.સી.બુકની વિગતો પૂછતાં તે ગલ્લાતલ્લા કરતા સંતોષકારક જવાબ આપી શક્યો ન હતો. પરિણામે તેને પોલીસ સ્ટેશન લાવી વધુ તપાસ હાથ ધરાઈ હતી.
પોલીસે ઇ-ગુજકોપ/પોકેટકોપ એપ્લિકેશન દ્વારા મોટરસાયકલના એન્જિન અને ચેસીસ નંબર નાખી તપાસ કરતા મોટરસાયકલ અરવિંદભાઇ મગનભાઈ નમેરા રહે. હરબટીયાળી તા. ટંકારા વાળાની માલિકીનું છે અને તા.૨૪/૧૧ થી ૨૫/૧૧ની રાત્રી દરમિયાન હરબટીયાળી નજીકની વાડીમાંથી ચોરી થયેલ હોવાનું સામે આવ્યું હતું. આ ઉપરાંત આરોપીની અંગઝડતી કરતાં તેની પાસે ટેકનો કંપનીનો એન્ડ્રોઇડ મોબાઇલ ફોન મળ્યો, જેમાં કોઈ સિમકાર્ડ નહોતું. મોબાઇલ અંગે તપાસ કરતા જાણવા મળ્યું કે એ જ સમયગાળા દરમિયાન હરબટીયાળી ગામ નજીક આવેલ સ્પેરોન કારખાનાના લેબર ક્વાર્ટરમાંથી મોબાઇલ ચોરી થયેલી ફરિયાદ નોંધાઈ હતી. પોલીસની પૂછપરછ દરમિયાન આરોપી રવિ વેસ્તાભાઈ મૈયડીયા ઉર્ફે સેકડા મુવેલ ઉવ.૨૦ રહે. હાલ ચાચાપર ગામ ઓરેંજ પોલીપેક કારખાનાના લેબર ક્વાર્ટરમાં મૂળ વતન ઘટબોરી ડેડકિયા કુવા ફળીયુ તા. કુકશી થાના બાગ જી. ધાર (મધ્ય પ્રદેશ વાળાએ મોટરસાયકલ અને મોબાઇલની ચોરી કર્યાની કબૂલાત આપી હતી. ટંકારા પોલીસે ચોરાયેલ બન્ને મુદામાલ કબજે કરી આરોપી સામે કાયદેસરની કાર્યવાહી શરૂ કરી છે.
