ગાર્ડી વિદ્યાપીઠ ખાતે યોજાયેલા વિશાળ શિક્ષણ સન્માન સમારંભમાં મોરબી સાર્થક વિદ્યામંદિરના પ્રિન્સિપાલ ગણેશભાઈ કંજારીયાને AIPSA- Educational Excellence Award-2025થી નવાજવામાં આવ્યા હતા. રાજ્યની ૩૦૦૦થી વધુ સેલ્ફ ફાઇનાન્સ શાળાઓમાંથી પસંદ કરાયેલા ૧૪૦ પ્રિન્સિપાલોમાં સાર્થક વિદ્યામંદિરના ગણેશભાઈને પણ સન્માનિત કરવામાં આવ્યા હતા.
મોરબીની સાર્થક વિદ્યામંદિરમાં શિક્ષણ ક્ષેત્રમાં શ્રેષ્ઠતા અને નવીનતા માટે કરાયેલા સફળ પ્રયત્નો માટે શાળાના પ્રિન્સિપાલ ગણેશભાઈ કંજારીયાને પ્રતિષ્ઠિત AIPSA – Educational Excellence Award 2025 મળ્યો છે. આ એવોર્ડ માટે ગુજરાતની અંદાજિત ૩૦૦૦થી વધુ સેલ્ફ ફાઇનાન્સ શાળાઓમાંથી ૬૫૦ થી વધુ શાળાઓએ નોંધણી કરાવી હતી. તમામ શાળાઓના વિવિધ માપદંડોની તપાસ અને મૂલ્યાંકન પછી રાજ્યભરના માત્ર ૧૪૦ જેટલા પ્રિન્સિપાલોને આ એવોર્ડ આપવામાં આવ્યો હતો.
આ ભવ્ય એવોર્ડ સમારોહ ગાર્ડી વિદ્યાપીઠ ખાતે યોજાયો હતો, જેમાં કેન્દ્રીય મંત્રી પુરુષોત્તમ રૂપાલા, ભૂતપૂર્વ શિક્ષણ મંત્રી ભુપેન્દ્રસિંહ ચુડાસમા સહિત અનેક અગ્રણીઓ અને મહાનુભાવો ઉપસ્થિત રહ્યા હતા. તેમની હાજરીમાં વિજેતાઓનું સન્માન કરવામાં આવતા કાર્યક્રમને વિશેષ ગૌરવ પ્રાપ્ત થયું હતું. ત્યારે મોરબી સાર્થક વિદ્યામંદિર શાળા પ્રવૃત્તિ આધારિત શિક્ષણ પદ્ધતિ, બાળકોના સર્વાંગી વિકાસ, અને શૈક્ષણિક ગુણવત્તા સુધાર માટે સતત પ્રયત્નશીલ રહી છે. પ્રિન્સિપાલ ગણેશભાઈ કંજારીયાના માર્ગદર્શન હેઠળ શાળાએ નવીન શિક્ષણ પદ્ધતિઓ, શૈક્ષણિક આયોજન અને વિકાસાત્મક પ્રવૃત્તિઓ દ્વારા બાળકોના સર્વાંગી વિકાસમાં મહત્વપૂર્ણ યોગદાન આપ્યું છે. આ પ્રગતિશીલ કાર્યને માન્યતા આપતાં ગણેશભાઈ કંજારીયાને ૨૦૨૫નો શ્રેષ્ઠ પ્રિન્સિપાલ એવોર્ડ મળ્યો છે, જે શાળા અને મોરબી જીલ્લા માટે ગૌરવની લાગણી ઊભી કરે છે.
