કેડેટ્સ દ્વારા શિસ્તબદ્ધ પરેડ અને મહાપુરુષોની પ્રતિમા સફાઈ દ્વારા રાષ્ટ્રપ્રેમનો સંદેશ.
મોરબી નવયુગ ગ્રુપ ઓફ કોલેજમાં NCC દિવસ ઉત્સાહભેર ઉજવાયો હતો. જેમાં કેડેટ્સે શિસ્તપૂર્ણ પરેડ, ડ્રિલ અને સ્વચ્છતા અભિયાન જેવી પ્રવૃત્તિઓ દ્વારા રાષ્ટ્રપ્રેમનો ઉત્સાહ વ્યક્ત કર્યો હતો. પરેડ બાદ કેડેટ્સે નવા બસ સ્ટેન્ડ ખાતે સરદાર પટેલ અને નેતાજી સુભાષચંદ્ર બોઝની પ્રતિમાની સફાઈ કરી હતી. પ્રમુખ પી.ડી. કાંજીયા, પ્રિન્સિપાલ સતીશ વોરા અને NCC ANO શીતલબેન કંઝારિયાના માર્ગદર્શન હેઠળ કાર્યક્રમ સફળતાપૂર્વક સંપન્ન થયો હતો.
મોરબીની નવયુગ ગ્રુપ ઓફ કોલેજમાં NCC દિવસ રાષ્ટ્રભાવના અને શિસ્તના સંકલ્પ સાથે ભવ્ય રીતે ઉજવાયો હતો. કોલેજના NCC કેડેટ્સે રાષ્ટ્રીય એકતા અને દેશભક્તિના મૂલ્યોને ઉજાગર કરતાં વિવિધ પ્રવૃત્તિઓમાં ભાગ લીધો હતો. સવારે કોલેજના પટાંગણમાં કેડેટ્સે શિસ્તબદ્ધ પરેડનું પ્રદર્શન કર્યું હતું. એકસરખા પગલાં, કમાન્ડ સાથેની દૃઢતા અને તેજસ્વી મનોબળ સાથે કેડેટ્સે ઉપસ્થિત લોકોનું ધ્યાન ખેંચ્યું હતું. કાર્યક્રમ દરમિયાન નવયુગ ગ્રુપ ઓફ એજ્યુકેશનના પ્રેસિડેન્ટ પી.ડી. કાંજીયાએ કેડેટ્સને પ્રેરણાદાયી સંબોધન કરતાં જણાવ્યું હતું કે NCC માત્ર તાલીમ પુરતી નથી, પરંતુ રાષ્ટ્ર માટે જીવવાની સન્માનસભર પ્રેરણા પૂરી પાડે છે. તેમણે કેડેટ્સને રાષ્ટ્રપ્રેમ, શિસ્ત અને સેવાભાવને જીવનમાં સ્થાન આપવા અનુરોધ કર્યો હતો.
પરેડ પૂર્ણ થયા બાદ કેડેટ્સ મોરબીના નવા બસ સ્ટેન્ડ ખાતે પહોંચ્યા હતા જ્યાં રાષ્ટ્રનાયકોની પ્રતિમાઓની સફાઈનું આયોજન કરવામાં આવ્યું હતું. લોખંડી પુરુષ સરદાર વલ્લભભાઈ પટેલ અને રાષ્ટ્રીય ક્રાંતિના પ્રતિક નેતાજી સુભાષચંદ્ર બોઝની પ્રતિમાની સફાઈ કરીને કેડેટ્સે તેમને ભાવભીની શ્રદ્ધાંજલિ અર્પણ કરી હતી. આ સ્વચ્છતા અભિયાન દ્વારા કેડેટ્સે સામાજિક જવાબદારી અને રાષ્ટ્રનાયકો પ્રતિ સન્માનની ભાવના પ્રગટાવી હતી. આ સમગ્ર આયોજન નવયુગ ગ્રુપ ઓફ એજ્યુકેશનના પ્રેસિડેન્ટ પી.ડી. કાંજીયાની પ્રેરણાથી તથા પ્રિન્સિપાલ સતીશ વોરા અને NCC ANO શીતલબેન કંઝારિયાના માર્ગદર્શન હેઠળ સફળતાપૂર્વક પૂર્ણ થયું હતું.









