હળવદની શ્રીજી હોસ્પીટલની સામે રોડ ઉપર ગત રોજ બાઈક અને ટ્રેઇલર વચ્ચે અકસ્માત સર્જાયું હતું. જેમાં ટ્રેઇલર ચાલકે બાઈકને હડફેટે લેતા એક યુવકનું કમકમાટી ભર્યું મોટ નીપજ્યું હતું. જયારે અન્ય એક ગંભીર રીતે ઘવાયો હતો. જેથી સમગ્ર મામલે પોલીસે નિવેદનો નોંધી આગળની કાર્યવાહી હાથ ધરી છે.
બનાવ અંગેની મળતી વિગતો અનુસાર, હળવદની શ્રીજી હોસ્પીટલની સામેનાં રોડ ઉપરથી બે મિત્રો પોતાનું જી.જે-૩૬-એન-૮૨૭૭ નંબરનું બાઈક લઈ પસાર થઈ રહ્યા હતા, જે દરમિયાન પુરપાટ ઝડપે આવતા આર.જે.-૩૬-જી.એ.-૫૩૪૯ નંબરના ટ્રેઇલરના ચાલકે બાઈકને હડફેટે લીધું હતું. જેને કારણે ફરિયાદી રણજીત ગોરધનભાઇ સુરેલા અને તેના મિત્ર વિક્રમ લાભુભાઇ બહાપીયાને ગંભીર ઈજાઓ પહોંચી હતી. જેથી તેઓને તાત્કાલિક હોસ્પિટલ ખાતે ખસેડવામાં આવ્યા હતા. પરંતુ હોસ્પિટલે સારવાર મળે તે પહેલા જ વિક્રમનું મોટ નિપજતા પરિવારમાં શોકની લાગણી ફેલાઈ છે. ત્યારે પોલીસે આઈ.પી.સી. કલમ ૨૭૯,૩૩૭,૩૦૪(અ) તથા એમ.વી.એકટ કલમ ૧૭૭,૧૮૪, મુજબ ગુનો નોંધી ટ્રેઇલર ચાલકને પકડવા ચક્રો ગતિમાન કર્યા છે.
