મોરબી તાલુકા પોલીસે રંગપર, લક્ષ્મીનગર અને બરવાળા ગામે જુગારની ત્રણ અલગ-અલગ રેઇડ કરી કુલ ૧૭ ઇસમોને ઝડપી પાડ્યા હતા. પોલીસ દ્વારા ત્રણેય સ્થળેથી કુલ રૂ.૧,૮૭,૯૦૦/-ની રોકડ રકમ કબજે કરી જુગારધારા હેઠળ કાર્યવાહી હાથ ધરવામાં આવી છે.
મોરબી તાલુકા પોલીસ દ્વારા જુગારની ગેરકાયદેસર પ્રવૃત્તિ સામે હાથ ધરાયેલી કાર્યવાહી અંતર્ગત ત્રણ અલગ-અલગ સ્થળે રેઇડ કરવામાં આવી હતી. જેમાં રંગપરથી જીવાપર જવાના રસ્તે આવેલી ઘનશ્યામસિંગ સજ્જનસિંહ ઝાલાવાડીની ઓરડીમાં ગંજીપત્તાના પાનાથી જુગાર રમતા ૧૦ ઇસમોને રૂ.૧,૨૨,૭૦૦/-ની રોકડ સાથે ઝડપી પાડવામાં આવ્યા હતા.
આ ઉપરાંત લક્ષ્મીનગર ગામના કોળીવાસમાં સ્ટ્રીટ લાઇટના અજવાળામાં જાહેરમાં જુગાર રમતા ૪ ઇસમોને રૂ.૨૦,૬૦૦/-ની રોકડ સાથે, જ્યારે બરવાળા ગામમાં ખુલ્લી શેરીમાં પ્લોટ વિસ્તારમાં જુગાર રમતા ૩ ઇસમોને રૂ.૪૪,૬૦૦ની રોકડ સાથે ઝડપી પાડવામાં આવ્યા હતા. આમ, ત્રણેય રેઇડમાં કુલ ૧૭ જુગારી ઝડપાયા અને કુલ રૂ.૧,૮૭,૯૦૦/-ની રોકડ રકમ કબજે કરવામાં આવી છે. આ સાથે પોલીસે તમામ આરોપીઓ વિરુદ્ધ જુગારધારા હેઠળ ગુનો નોંધી આગળની કાર્યવાહી હાથ ધરી છે.
