મોરબી જિલ્લા તેમજ સૌરાષ્ટ્રમાં વાહન ચોરીના બનાવો અટકવાનું નામ જ નથી લઈ રહ્યા. જેને લઇ સ્થાનિક લોકોનું કહેવું છે કે વાહન ચોરતી ટોળકી ફરી સક્રિય થઈ છે. ત્યારે તાજેતરમાં જ મોરબી જીલ્લાના નાની વાવડી ગામમાં એક નવી નક્કોર બાઈકની ચોરી થતાં ખળભળાટ મચી જવા પામ્યો છે.
મળતી માહિતી અનુસાર, ગત તા.૨૪/૦૯/૨૦૨૨ ના રોજ ફરિયાદી પ્રદિપસિંહ બહાદુરસિંહ ઝાલા પોતાનું તાજેતરમાં જ લીધેલું GJ-36-AD-5329 નંબરનું હિરો કંપનીનુ ગ્રે બ્લેક કલરનુ બાઈક પોતાના નાની વાવડી ગામ લુહાર શેરીમાં આવેલ ઘર પાસે પાર્ક કરીને ગયા હતા. ત્યારે તેઓએ બીજા દિવસે સવારે પાર્કિંગમાં જઈ જોતા ત્યાં બાઈક મળી આવ્યું ન હતું. જેથી તેઓએ બાઈક શોધવા જાત તપાસ કરી હતી. પરંતુ બાઈક ન મળતાં આખરે પ્રદિપસિંહ બહાદુરસિંહ ઝાલા એ ગઇકાલે મોરબી તાલુકા પોલિસ મથકમાં ફરીયાદ નોંધાવી છે. જેને લઈ પોલીસે વાહન ચોર ટોળકીને ઝડપી પાડવા તપાસના ચક્રો ગતીમાન કર્યા છે.
