મોરબીમાં માર્ગ અકસ્માતની વધુ એક ઘટના સામે આવી છે. જેમાં મોરબી શહેરમાંથી રિક્ષા લઈને જીંજુડા ગામે આવેલ દરગાહે જઈ રહેલ પરિવારને અકસ્માત નડ્યો હતો જેમાં કાર સાથે સર્જાયેલ આ અકસ્માતમાં છ લોકો ઈજાગ્રસ્ત થતા તેઓને સારવારમાં ખસેડવામાં આવ્યા હતા.
મળતી માહિતી અનુસાર, મોરબી શહેરના મકરાણીવાસ અને કબીર ટેકરી વિસ્તાર ના રહેવાસી પોતાની રીક્ષા લઈ મોરબીથી જીંજુડા ગામે આવેલ દરગાહ ખાતે દર્શન કરવા નીકળ્યા હતા. જેઓને મોરબીના નવલખી રોડ ઉપર આવેલ જેપુર ગામ પાસે ત્રિમંદિર નજીક અકસ્માત નડ્યો હતો. જેમાં કાર અને રીક્ષા વચ્ચે અકસ્માત સર્જાતા રિક્ષામાં સવાર રેહાન આરીફભાઇ અજમેરી, મોહિત મુસાભાઇ અજમેરી, મુસ્કાન યાસીન અજમેરી, આરજુ અસલમભાઈ અજમેરી, મેરુજા યાસીન અજમેરી અને શેરબાનુ યાસીનભાઈ અજમેરી (રહે. બધા મોરબી) નામના કુલ છ લોકો ઈજાગ્રસ્ત થયા હતા. જેથી તમામ ઇજાગ્રસ્તોને સારવાર અર્થે હોસ્પિટલ ખસેડવામાં આવ્યા હતા. તેમજ સમગ્ર મામલે મોરબી તાલુકા પોલીસે કાર્યવાહી હાથ ધરી હતી.
